Мин дьиэ кэргэним сэрии сылларыгар

Мин эбэм, аҕам ийэтэ Андросова (Бехтюева) Анна Спиридоновна 1936 с. Таатта улууһун Уус Тааттатыгар төрөөбүтэ. Аҕа дойду Улуу сэриитин сылларыгар мин эбэм тоҕус саастаах оҕо эбит. Бииргэ төрөөбүт төрдүөлэр,  эбэм саамай кыралара үһү.

Бу ынырык, иэдээннэх сылларга мин эбэм убайдаах эдьиийбин кытта улахан дьонтон итэҕһэ суох күүрээннээх үлэҕэ туруммуттар. Күһүн, саас колхоз араас үлэтигэр: от-мас тиэйиитигэр, сири оҥоруу үлэтигэр оҕус сиэтэллэр эбит. Ол курдук, бааһынаттан бурдук тобоҕун хомуйан кладовщика туттараллар. Кэлин бурдугу бэйэлэрэ үүннэрэр буолбуттар. Ол бурдуктарын сиэрпэнэн быһан сослуон баайаллар үһү. Бу сылларга үлэ барыта күрэхтэһии. Былааннаах үлэни ким эрдэ аһары толорбут салайааччылартан хайҕал ылар эбит.

Сэрии алдьархайыгар мэҥэһик буолан уот кураан дьыллар турбуттар. Сайыҥҥы куйаас күннэргэ мин эбэм төһө да сылайбытын, аччыктаабытын иһин от охсуутугар мунньуутугар үлэлээбит. Маннык ыарахан үлэни саҥардыы улаатан эрэр кыыс, эбэм эрэйдээх, санныгар сүкпүт. Онтон хойут субан сүөһүгэ үлэлээбит.

Мин хос эһэм Бехтюев Спиридон Николаевич 1941 сыллаахха сэриигэ барбыт. Эбэм «Лермонтов» борокуотунан фроҥҥа аҕатын атаарбытын өйдүүр эбит. Ол онно олус элбэх киһи барбыта үһү.

Ити курдук мин дьиэ кэргэммэр сэрии содула эмиэ биллэн ааспыт. Кинилэр Кыайыы туһугар күүстэрин-күдэхтэрин харыһыйбакка үлэлээн, охсуһан биһиги кыһалҕата суох оҕо саастаннахпыт. Махтал буоллун Кыайыыны уһансыбыттарга!

Павлина Андросова