Оҕо сааһым көс олоҕо

Мин ахсынньы 25 күнүгэр 1935 с. Дьохсоҕон нэһилиэгэр холкуостаах кэргэнигэр төрөөбүтүм. Үс бииргэ төрөөбүттэр этибит. Убайым Иван миигиттэн биир сыл аҕа этэ. Бырааппыт Григорий кыра сааһыгар ыалдьан өлбүтэ.

Аҕабыт эдэр сааһыгар өлбүтэ. Инньэ гынан убайбынаан ийэбит иитиитигэр хаалбыппыт. Ийэбит оччолорго холкуоска үүт астааһыныгар үлэлиирэ. Холкуостаахтарга анаан суорат, иэдьэгэй оҥороро. Мин ийэбэр көмөлөһөн сэппэрээтэр, иһит сууйарым. Убайым тугу кыайарынан холкуоска үлэлиирэ. Оччолорго, сэрии сылларыгар, ааттаах кураан буолбута, сир-дойду харааччы хаппыта, хара буорунан көрбүтэ, күөх диэн суох курдуга. Күөллэр бары кэриэтэ уолбуттара. Үөһэнэн үөр хара аһыҥалар көтөллөрө.

Үлэлиир холкуостаахтарга ыйга 2-3 киилэ бурдук биэрэллэрэ. Ону хааһылаан сиэн ыйы туоруурбут. Ийэбит үүт астыыр буолан суорат, иэдьэгэй эбинэн маныаха кэллэхпит. Дьоннор хоргуйан өлүтэлииллэрэ. Ытык Күөлгэ сатыы тахсан иһэн охтоллоро. Ийэбит сайылык, кыстык фермаларынан көһө сылдьан ынах ыан биһигини улаатыннарбыта. 1944 с. ийэбит Сэмэн Үчүгээйэпкэ кэргэн тахсан, Ытык Күөлгэ көһөн киирбиппит. Онтон оскуолаҕа киирбитим. Сэттис кылааһы 1945 с. бүтэрбитим. Сорох сыл олорор сир булуллубакка үөрэммэккэ хаалбытым. 4-с кылааска Охотскай перевозка биир чиэппэр, Дьабарахы начальнай оскуолатыгар биир кыһын үөрэнэ сылдьыбытым.

1952 с. куоракка сельхозтехникумҥа үөрэнэ киирбитим. 1959 с. 2-с курска үөрэнэ сылдьан армияҕа барбытым.

Бочонин Константин Романович. 2005 с.