1934 с. Таатта оройуонун Аллараа Амма нэһилиэгэр хокуостаах бааһынай кэргэнигэр төрөөбүтүм. Аҕабыт Канаев Егор Иванович Охотскай Перевоз II Алдан нэһилиэгин олохтооҕо этэ. Кыһынын бултуура, сайынын оттуура. Ийэбит Канаева Евдокия Чөркөөхтөн төрүттээҕэ. Сэрии сылыгар Дальстрой диэн тэрилтэҕэ сир солооһунугар үлэлээбитэ. 1941 с. сут-кураан буолбута. Сир-дойду кууран-хатан, от, бурдук үүммэтэҕэ. Аччыктааһын, хоргуйуу саҕаламмыта. Кириэн, кииһилэ, үөрэ от хомуйан аҕаларбыт. Ону ийэбит буһаран ытыйаан ас оҥорон сиэтэрэ. Бэс ыйын 22-с күнүгэр Аҕа дойду сэриитэ буолбута. Армияҕа барар саастаах дьону хомуйбуттара. Нэһилиэккэ оҕонньоттор, дьахталлар, оҕолор хаалбыттара. Сэрии бириэмэтигэр холкуоска сир хорутуутугар, оҕус сиэтиитигэр, атынан сир тарааһыныгар сылдьар этим. Сайын окко үлэлиирбит. Кураан буолан ходуһа үүммэтэҕэ. Дулҕалаах, уулаах сөкүнү оттуур этибит. Отууга хоно сытан күһүн хойукка дылы оттуур этибит. Сэттис кылаас кэнниттэн холкуоска, сопхуоска хонуу үлэтигэр үлэлээбитим. Трактористаабытым, киинэ көрдөрөргө мотористаабытым, көмө механигынан уонча сыл үлэлээбитим. Сокращениеҕа баран райпоҕа үлэҕэ киирбитим. Уонтан тахса сыл хачыгаардаан баран пенсияҕа тахсыбытым.

Иван Егорович Канаев. Олунньу 22 күнэ 2005 сыл