Сэрии кэмигэр мин дьиэ кэргэним

Мин хос эһэм Неустроев Александр Николаевич сэрии саҕаланыытыгар 16-лаах эбит. Кинилэр Таатта улууһун Уус Тааттатыгар, Хара Алдаҥҥа олорбуттар. Бастакы хомуурга бииргэ төрөөбүт убайа Петр Николаевич барбыт. 1942 с. өлбүтүн туһунан сурук кэлбит. 1943 с. эһэм ситэ 18 сааһын туолбакка сылдьан ыҥырыллыбыт. Кини 1937-с Львовскай кыһыл знамялаах дивизия 76-с гвардейскай артиллеристскай полкатыгар бастакы нүөмэрдээх наводчигынан, хорсун разведчигынан сулууспалаабыт. Сэрииттэн кэлэригэр элбэх бойобуой мэтээллэрдээх, Аҕа дойду сэриитин II степеннээх орденнаах эбит. Аҥар атаҕын сүтэрэн, хаҥас илиитин тоҥолоҕун уҥуоҕа үлтүрүйэн, улахан контузиялаах I группалаах инвалид буолан төннүбүт. Сэрииттэн 1946 с. кэлбит. Кыайыы күнүн госпитальга көрсүбүт. Дойдутугар кэлээт, почта таһааччынан үлэлээбит. Ол сылдьан эбэбин көрсөн 1948 с. ыал буолбуттар.

Хос эбэм Марфа Ильинична Неустроева сэрии саҕаланыытыгар 13-тээх эбит. Түөрт убайдара Печетовтар бастакы хомуурга түбэһэн барбыттар. Ким да төннүбэтэх. Бары көлүөһүнэй тракторга үлэлииллэрэ үһү. Бэрээйи алааһын бастыҥ трактористара эбиттэр. Эбэм ийэтин кытта бары үлэни тэҥҥэ үлэлэспитинэн барбыт: ынах ыаһан, ньирэй эмтэрэн, ынах хомуйан, оттоһон. Оннооҕор көлүөһүнэй тракторга сеялкаҕа олорон бурдук хомууругар көмөлөһөр эбит. Ас-таҥас суох буолан быраҕыллыбыт тириини илдьиритэн буһаран, ону да кистээн сииллэр эбит. 1942 с. сут буолан отторо бүтэн, саас Тааттаттан Томпоҕо Ыҥаа диэн сиргэ сүөһүлэрин үүрэн көһөн барбыттар. Таҥастара чараас, эбиитин аччык дьон нэһиилэ тиийбиттэр. Сайын дойдуларыгар төттөрү кэлбиттэр. Сир оҥоһуутугар үлэлээбит. Аҥардас сүгэнэн кэрдэн солооһун солооннор сонуок оҥорбуттар. 1944 с. онтукаларыттан бурдук бөҕөтүн хомуйбуттар. Онтон син бурдук үүнэн, астанан-таҥастанан санаалара кэлбит. Сэрии бүтэрин саҕана эбэм үүт астааччынан үлэлээбит. Ол сылдьан эһэбин көрсөн ыал буолбуттар.

Ити курдук сэрии сута, ыар сыллара мин дьиэ кэргэммин эмиэ таарыйан ааспыт.

Олесь Максимов