Сэрии иннинэ Харбалаах Амматын уҥуор Талкы хайатын тэллэҕэр олорбуппут. Аҕам бырааттарын кытта бары бииргэ. Оҕолор кыра этибит. Мин саамай улаханнара 4 саастааҕым. Икки убайбыт 1941 с. сэриигэ барбыттара. Аҕам 1942 с. бэс ыйыгар ыҥырыллыбыта. Ийэбинээн атаарбыппытын өйдүүбүн.

Сэрии сыллара киһи сатаан да суруйбат ыарахан сыллара этэ. Онуоха сут-кураан дьыллар буолбуттара. Ийэм, саҥаһым 1943 с. аас-туор олохтон ыалдьан өлбүттэрэ. Эбэм босхоҥ буолан турбат, хаампат этэ. Онон 4 оҕону кытта эбэбин ыалга тарҕаппыттара. Мин Павел Христофорович Мироновка иитиллибитим. Кини бастакы кэргэнэ Ульяна Андреевна эдьиийим этэ. Кинилэр икки кыра оҕолоохторо 1943 с. өлбүттэрэ.

Ас-таҥас мөлтөҕө, эмп-томп да кыаллыбат этэ. Сриигэ барбыттар кэргэттэригэр ыйга 2-3 киилэ туорах бурдук биэрэр быһыылаахтара. Ол да торуччалаах эҥин, эбиэс быһылааҕа.

Кураан буолан от үүммэккэ сүөһүлэр кытта хоргуйаллара. Эр дьон кыайар-хотор өттүлэрэ сэриигэ бараннар үлэһит илии тиийбэт этэ. Ол эрэн ыаллар сүрдээх түмсүүлээхтэрэ. Бэйэлэрэ нэһиилэ сылдьар эрээри үлэлии, көмөлөсүһэ сатыыллара. Пароход кэллэҕинэ дьахталлар куруустуулларын көрөрүм. Наһаа тымныыга, бадарааҥҥа таһаҕасчыттар Охотскай перевозка эрэй бөҕөнөн ааһалларын өйдүүбүн. Биһиэхэ сылдьан аһаан, сынньанан ааһаллара, сороҕор хоноллоро даҕаны.

Армияттан дьоннорун суругун, ким кэлэрин наһаа күүтэллэрэ. Биир эмэ киһи кэллэҕинэ кимиэхэ туох ас баарынан, алаадьылаах, саламааттаах көрсөллөрө. Кэлбэтэх саллааттар дьонноро ытаан-соҥоон эрэйдэнэллэрэ.

Мин дьонум 1945-46 сс. кэлбиттэрэ. Кураан буолан олохпут сэрии кэнниттэн да көммөтөҕө.

Оскуолаҕа үөрэнэр да сылларбыт олус ыарахан, кырыымчык этилэр. Оҕолор сорохторо ыалдьаллара, ыалдьан уурайаллара. Өлөллөрө даҕаны.

Ахтыыны суруйбута Вера Прокопьевна Попова