Эбэм тыыл ветерана

Мин эбэм – Халыева Екатерина Терентьевна 12 саастааҕар Аҕа дойду сэриитэ саҕаламмыт. Онно кини Чымнаайыттан Чычымахха ыалга дьиэлэнэн, оскуолаҕа үөрэнэ сылдьыбыт.

Салҕыы олорор ыалын аҕалара сэриигэ баран, оскуолаҕа үөрэнэрэ тохтоон хаалбыт. Чымнаайыга бииргэ төрөөбүт эдьиийэ Вера Терентьевна ферма ыанньыксыта эбит. Кини эдьиийигэр көмөлөһөн сүөһү көрсүбүт. Сайынын от мунньуһан, бурдук түүтэхтэһэн туох баар үлэҕэ барытыгар үлэлэһэн, улахан дьону кытта тэҥҥэ сыраласпыт. Оннук үлэлии сырыттаҕына, 14 сааһыгар үлэҕэ ыҥырыы бэбиэскэтин тутар. Онно дьоно бары соһуйбуттар уонна ыраах Өлүөнэ өрүс уҥуоргу биэрэгэр турар, Хачыкаатынан ааһар «Сталин суолун» тутуутугар, барар буолбутуттан улаханнык сонньуйбуттар. Ыытымаары: «Оҕобутун илдьимэҥ, бэйэбитигэр да үлэтэ, көмөтө сүрдээх» — диэн эдьиийэ көрдөспүтүн ылымматахтар. Чымнаайыттан кинини соҕотохтуу ыыппыттар.

Улуустан барыта 20 кыыһы бииргэ мунньан илпиттэр. Онно 4 кыыс оскуола оҕото барсыбыт – онтон биирдэстэрэ мин эбээм эбит. Онон баара-суоҕа 14 сааһыгар тааһы-буору таһар, дьиэтиттэн-уотуттан арахсан тыыл ыарахан үлэтин намчы санныгар сүкпүт. Сааһы, сайыны, күһүнү быһа икки көлүөһэлээх тачканан, бэриллибит нуорманы улахан кыргыттары кытта тэҥҥэ тастаран сордообуттар. Билигин ону эдьиийдэрим: «Олох хаайыылаахтар үлэлиир үлэлэрин сүктэрбит эбиттэр» — диэн хомойон кэпсииллэр.

Эбэм эрэйдээх ол иһин наар илиитин-атаҕын тымырдара, сүһүөхтэрэ ыалдьара. Ол да буоллар кини 6 кыыһы, 6 уолу төрөппүт дьоллоох герой-ийэ буолбут. Кини оннук ыарахан үлэҕэ үлэлээбит докумуона сэрии кэнниттэн умайан хаалбыт. Ол да буоллар эбэбин көрдөөн булан тыыл ветерана дэппиттэр. Мин эбэбинэн киэн туттабын, сөҕөбүн, махтанабын!

Саргылаана Васильева, 2-с кылаас үөрэнээччитэ