Малышев Николай Романович (1915-1985) «Ађа дойду сэриитин II степенэ», «Албан Аат III степенэ» орденнар кавалердара, Саха АССР үтүөлээх учуутала.

Чычымахха учууталлыы сылдьан 1942 с. армияђа  ыҥырыллыбыт. Московскай, Рязанскай, Смоленскай уобаластарынан сэриилэспитэ, отделение командира этэ. 1944 с. бааһыран 2-с группалаах инбэлиит буолан, дойдутугар эргиллэн кэлбитэ. Чычымах, Чымнаайы оскуолаларыгар учууталынан, директорынан үлэлээбитэ. «Ађа дойду сэриитин II степеннээх», «Албан Аат III степеннээх» орденнар, «Германияны  кыайыы иһин» мэтээл кавалердара. Саха АССР  үтүөлээх учуутала.

***

1915 с. Аллараа Амма нэhилиэгэр орто бааhынай кэргэнигэр төрөөбүтүм. Чычымах оскуолатыгар үөрэнэ сылдьан Дьокуускайга тыа хаhаайыстыбатын техникумугар үөрэнэ киирбитим.  Ол эрээри сөбүлээбэккэ ити үөрэхпин тохтотон,  педучилищеђа үөрэнэ киирбитим уонна 1934 с.  бутэрбитим.

Мин 1942 с. армияђа ыҥырыллыбытым. Иркутскай куорат таhыгар  Мальта диэн тимир суол станциятыгар байыаннай чааска тиийбитим. Отделение командирдарын суhал курстарыгар үөрэммитим, ону бүтэрээт, сержант званиелаах отделение командирынан ананан арђаа фроҥҥа барбытым.

Москва уобалаhыгар Волоколамскай оройуонугар биир нэдиэлэлээх сынньалаҥҥа сылдьан баран, быhа передовой линияђа ыыппыттара. 197-с стрелковай полка оhуобай химическэй взводугар химическэй разведка отделениетын командирынан сылдьыбытым. Сэриилэhэн Рязанскай, Смоленскай уобаластары туораабыппыт

 Смоленскай куорат анныгар ыараханнык бааhыран Москва чугаhыгар Пески диэн станцияђа биир ый госпитальга сыппытым кэннэ, Баку куоракка ыыппыттара. Онно биэс ый эмтэнэн, иккис группалаах инбэлиит буолан, босхолонон олунньу бүтүүтүгэр 1944 с. дойдубар эргиллэн кэлбитим. Фроҥҥа сылдьарым былаhын тухары рота агитаторынан үлэлээбитим. Курска үөрэнэ-үөрэнэ, рота штабыгар, сорох кэмҥэ полк штабыгар суруксуттаабытым.

 Кэлээт, кулун тутар 10 күнүттэн учуутал мындыр сыралаах үлэтин сађалаабытынан барбытым. Барыта 38 сыл учууталлаабытым, директордаабытым. Кэлин алта сыл совхозка рабочайдаабытым. 1957 сыллаахха Саха АССР Yтүөлээх  учууталын аатын иҥэрбиттэрэ. Нэhилиэк общественнай үлэтигэр билигин да күүhүм кыайарынан кыттабын.

Наҕараадалара: Ађа дойду сэриитин II степеннээх ордена, «Албан Аат» III степеннээх ордена, «Германияны  кыайыы иhин» мэтээл,  «1941-45 сс. үлэђэ килбиэнин иhин» мэтээл, «За трудовое отличие» мэтээл, Саха Республикатын Yтүөлээх учуутала, РСФСР, Саха АССР Верховнай Советтарын Бочуотунай Грамоталара.