Софронов Степан Данилович (1915-1997) Аҕа дойду Улуу сэриитигэр үлэ фронун кыттыылааҕа, Таатта улууһун Бочуоттаах олохтооҕо

 1932с. комсомол, 1954 с. партия чилиэнэ  буолбут. 1934с.-1943с. Амма нэһилиэгин секретарынан, председателинэн, колхозтаађы комсомольскай тэрилтэ секретарынан  үлэлээбит. 1943-45с. армияђа ыҥырыллан үлэ фронугар сылдьыбыт. Сэрии кэнниттэн колхозка биригэдьииринэн, сельпо председателинэн, сельсовет секретарынан, өр сылларга сельсовет председателинэн, совхоз кадровай булчутунан үлэлээбит.  12 сыл  партийнай тэрилтэ секретарынан, 6 сыл партия райкомун чилиэнинэн талыллан үлэлээбит. »Германияны кыайыы иһин», «Yлэђэ килбиэнин иһин» мэтээллээх, улуус Бочуоттаах гражданина.

***

1941 cыл бэс айын 22 күнүгэр гитлеровскай Германия Советскай Союзка сэриинэн саба түспүтэ уонна 1945 с. ыам ыйын 9 күнүгэр букатыннаахтык кыайтарбыта. Кыайыы 40 сылын юбилейынан сибээстээн трудовой фронт уонна тыыл сэрии бириэмэтигэр диэн темађа ађыйах тылы бэлиэтиибин.

Сэриилэhии хара бастакыттан суостаах-суодаллаах, хаан тохтуулаах, үгүс куораттар, нэhилиэнньэлээх пууннар умайбыттара, күл-көмөр буолбуттара.

Сэриилэhии арђаа кыраныыссаттан быдан ыраах, ССРС илиҥҥи кыраныыссатынан Саха сириттэн тиийэ уоттаах сэриигэ саха чулууттан чулуу уолаттара ыҥырыллыбыттара. Cылга хас да хомуурдар барбыттара. Саха сирин тыылыгар үлэhит илии олох аччаабыта. Нэhилиэккэ кырдьађас ођонньоттор, эмээхситтэр, дьахталлар уонна ођолор эрэ хаалбыттара. Тыылга сүөhүнү аччатыы көҥүллэммэт этэ. Ол кэмҥэ кыhайбыт курдук сут, кураан буолта. Ол да буоллар аччыктыыртан, сылайартан ким да куттаммат, түүннэри- күнүстэри тыылы бөђөргөтүүгэ, фроҥҥа аhынан-таҥаhынан, харчынан көмөлөhүүгэ анаан үлэлииллэрэ. Фроҥҥа көмөђө туох баар харчыларын, астарын, заемнарын, итии таҥастарын босхо биэрэллэрэ. Дьахталлар, кыргыттар атынан таhађас таhаллара, почта сүүрдэллэрэ, от-мас тиэйэллэрэ. Оччолорго массыына, трактор диэн суођа.

Мин 1941 сылтан 1943 сыл ыам ыйыгар диэри совет секретарынан уонна председателинэн үлэлээбитим. 1943 с. ыам ыйыгар Советскай армияђа ыҥырыллыбытым уонна Читанан, Иркутскайынан трудовой фроҥҥа мас заготовкатыгар икки сыл үлэлээбитим. Тимир суол станциятыттан арђаа күл-көмөр буолбут куораттары, нэhилиэнньэлээх пууннары тутууга маhы атаарар этибит. Онно ас-таҥас кэмчи, үлэ ыарахан этэ. Ол да буоллар сэриигэ кыайыы иhин, фронт  иhин, төрөөбүт Ийэ дойду иhин уонна Сталин иhин диэн девиhинэн харса-хабыра суох үлэлиирбит-хамныырбыт. Москва, Ленинград уо.д.а. куораттар өстөөђүнэн төгүрүтүллүбүттэрэ. Советскай буойуттар трудовой фронт уонна тыыл ахсаабат көмөтүнэн өстөөђү урусхаллаабыттара, төттөрү үүрбүттэрэ. Кыайыы былаађын аспыттара. Амма нэhилиэгиттэн 51 киhи эргиллибэтэђэ. Ол иhигэр 4 бырааттыы Дмитрий, Павел, Егор, Илья Винокуровтар.

Мин атын дьон курдук сэрии сылларыгар  эдэр энергиябын толору биэрэн үлэлээбитим.

Кулун тутар 9 күнэ, 1985 с.