Миронов Павел Христофорович (1915-1999) Аҕа дойду Улуу сэрритин кыттыылааҕа, «Ађа дойду сэриитин II-c степеннээх» орден, «Хорсунун иһин»,  «Германияны кыайыы иһин» мэтээллэр кавалердара.

 1943-1945с.с. сэриигэ сылдьыбыт. Керчь куораты босхолоһо сылдьан бааһыран, госпитальга эмтэнэн баран, Крым, Румыния, Болгария куораттарын босхолоспут. »Ађа дойду сэриитин II-c степеннээх» орден, «Хорсунун иһин»,  «Германияны кыайыы иһин» мэтээллэр кавалердара. 1947-1950 сылларга нэһилиэк сэбиэтин председателинэн уонна өр сылларга тыа хаһаайыстыбатын салаатыгар үлэлээбит. Партийнай тэрилтэ сэкирэтээрэ, народнай хонтуруол быһыытынан нэһилиэк общественнай олођор көхтөөхтүк кыттара.

***

1943 с. Дьохсоҕон сельпотугар агенынан үлэлии сылдьан армияҕа барбытым. Крымы босхолооһуҥҥа ручной пулеметчигынан  сылдьыбытым. Онтон Керчь куорат иһин кыргыһыыга ыараханнык бааһырбытым уонна Краснодарскай кыраайга Брюховецкай станцияҕа баар госпитальга 3 ый эмтэммитим. Доруобуйам туругунан сэриилэһэр армияҕа ыыппатахтара. Салгыы Крымҥа сулууспалаан баран, 1945 с. Румынияҕа байыаннай объектары харабыллыыр 217-с дивизияҕа түбэспитим. Араас омук уолаттарын кытта үөрүү-көтүү, кыайыы дьолун үллэстибиппит. Улуу Кыайыыны Румыния сиригэр көрсүбүтүм. Кэлин 2 түүннээх күн айаннаан Болгарияҕа, София куоракка тиийбиппит. Манна 1946 с. диэри сулууспалаабытым.

Сэрии сылларыгар Крымҥа батальон командира Дубининтан көрдөһөн Григорий Михайлович Тарабукинныын (Мэҥэ Хаҥалас) биир чааска түбэһэн, Румыниянан, Болгариянан бииргэ аһаан, утуйан сэрии иэдээнин тэҥҥэ үллэстибиппит. Кэлэн баран кинини Мэҥэ Хаҥалас военкоматын нөҥүө ыйыталаһа сатаатым да эппиэттээбэтэхтэрэ. 1946 с дойдубар төннө иһэн, Большой Невергэ саха саллааттара транспорт көрдөһө сырыттахпытына ,биир киһи кууһа түстэ. Көрбүтүм: убайым Трофим Егорович Мординов эбит. Онно үөрбүппүн умнубаппын.

Оччотооҕуга улуус салалтата куоракка сэрииттэн кэлбит буойуннары көрсөн, оҕуһунан, атынан бэйэлэрэ өйүө тэрийэн дойдубутугар аҕалаллара. Бу олус махталлаах дьаһал этэ.

П.Х. Миронов. «Умнуллубат Улуу Кыайыы. Саха сирэ Аҕа дойду сэриитин сылларыгар (1941-1945)», с. 170.