1 Star2 Stars3 Stars4 Stars5 Stars (No Ratings Yet)
Загрузка...
283 views

Сахабыт сирин туойабыт

Анна Васильева

Саха сирэ – мин дойдум

Тѳрѳѳбүт дойдубун туойабын-

Лиҥкинэс хара тыаларын

Тѳгүрүк алаас сирдэрин

Ыраас уулаах күѳллэрин

Субуллар уhун ѳрүстэрин

Очуос таас хайаларын.

Халыҥ хаардаах

Хабараан тымныытын

Устар уhун кыhыннаах

Ураты дьикти кѳстүүтүн.

Чэбдик ыраас салгынын

Чэгиэн-чиргэл дьоннорун.

Чаҕылхай сырдык күннэрин.

Кэмсиик курус тыалларын

Кѳмүѳл муус устарын.

Кус-хаас кэлиитин

От-мас тиллиитин

Кэрэ саас буоларын.

Сыралҕан сылаас куйааhын.

Кылгас күѳх сайынын

Нэлэмэн киэҥ хочотун

Сиэдэрэй сибэкки сыhыытын

Чараҥнаах тыатыгар

Дэлэгэй сир аhын.

Ойуулаан-оhуордаан

Хоhооҥҥо хоhуйан

Кѳмүс дуйдаах күhүнүн

Айылҕа чуумпурар кѳстүүтүн

Сѳҕүмэр элбэх кырааскатын

Сѳҕѳммүн одуулуу кѳрѳбүн.

Айылҕа баайбытын

Барытын харыстаан

Арчылаан ааттаhан

Кѳмүскээн күѳмчүлээн

Хаалларыах тустаахпыт

Кэлэр кѳлүѳнэ ыччакка.

Алексей Кулаковскай

Сахам сирин самаан сайына,

Кыыдааннаах кырыа кыhына,

Ѳрөгөйдөөх чаҕыл сааhа,

Байанайдаах быйаҥнаах көмүс күhүнэ

Урааҥхай сахаҕа сүппэттии иҥмит,

Сүрэҕэр-быарыгар хаалбаттыы хатаммыт.

Сандаарар-күндээрэр сандал саас салаллан

Курулуур-харылыыр көмүөллүү күүс угуо

Саҥалыы сайаҕас санааны салайыа,

Төрөөбүт дойдутун саман сайына

Күндүл күн уотунан угуттуо,

Сибэкки, от, дьэдьэн сытынан туймаардыа,

Саханы саймаархай санаалыа.

Дууhатын уулларан упчархай ырыалыа,

Сарсыарда саhарҕа сардаҥа уотугар

Чөмчүүк таас күлүмүн түhэрэр хаhыҥнаах

Саhарбыт сэбирдэх кутаалаах күhүнэ,

Кустук өҥ оҕуруо отону ыhыаҕа,

Араҕас илгэни дэлэтэн үөрдүөҕэ,

Тоторон дуоhутан үөрүүлээх ырыалыа,

Кыыдааннаах кырыалаах буркуннаах

Сырылас-сыыгынас туманнаах кыhыны

Кыпчыйыа, кымньыылыа, кыhайыа

Үлүскэн тымныынан үлэҕэ үтэйиэ,

Хабыр диэн тымныынан хатарыа-буhарыа

Ѳлбөккө үөрэтэн өрөгөй ырыалыа.

Валентина Кулачикова-Үрүччэ

Саха барахсан дэтэр кэмэ кэллэ

Айыы дойдутун амарах дьонноро,

Алгыс анаммыт ыраас дууhалаахтара,

Кэнчээри ыччаппыт кэскилин түстэhэ

Кэккэлии туран, күүспүтүн түмэн

Хара дьайыыттан хаххалаан,

Үрүҥ күҥҥэ сүгүрүйэ, үмүөрүhүөххэйиҥ.

Үчүгэй эрэ сүүрээни көҥүл сүүрүгүрдүөххэйиҥ

Арчылыаҕыҥ аныгы олоҕу

Сибэтиэй киhи сиэринэн туттан

Сирдээҕи сиппэтэх ырабытын ылынан

Дьэҥкэрэ көстөр күөх халлааҥҥа

Дьол торҕо буруотун унаарытыаҕыҥ.

Кири-хаҕы төрдүттэн сиппийэн,

Ааҥнаабыт алдьархайы үтэйэн

Аҕыйах бэйэбит омугу элбэтэн,

Туругура тупсуоххайыҥ.

Саха барахсан дэтэр кэмэ кэллэ

Ѳйбүт чэбдигирэн, санаабыт күүhүрэн

Ѳбүгэлэрбит ыйбыт алыптаах суолларынан

Тирэҕирэн, төрдүбүтүн ууhатан,

Туругуруоххайыҥ бар дьонум.