1 Star2 Stars3 Stars4 Stars5 Stars (No Ratings Yet)
Загрузка...
146 views

Афанасьев Михаил Куприянович — саахымакка сахалартан бастакы маастар

Афанасьев Михаил Куприянович

(14.02.1929-21.02.2010)

Саахымаччыт, тренер М.К. Афанасьев Чычымахха холкуостаах дьиэ кэргэнигэр төрөөбүтэ. 7 кылааһы бүтэрэн баран, холкуос үлэһитэ буолбута. Саахымакка бастакы уһуйааччыларынан аҕата Киппирийээн, убайа Аҕа дойду Улуу сэриитин кыттыылааҕа, Саха сирин 4 төгүллээх чемпиона Владимир Куприянович, учуутала А.Д. Баланов буолбуттара. Айылҕаттан бэриллибит ураты мындыр өйө киниэхэ сотору кэминэн нэһилиэгин, оройуонун күүстээх оонньооччута буоларыгар тиэрдибитэ. Кини 1957 с. Саахымакка сахаттан бастакынан ССРС спордун маастарыгар кандидат нуорматын толорбута, онтон 1966 с. эмиэ сахаттан бастакынан ССРС спордун маастарын аатын ылбыта.

М.К. Афанасьев республика 7 төгүллээх, «Урожай» спортивнай общество уобаластааҕы, илин эҥэрдээҕи уонна Бүтүн Россиятааҕы турнирдарын элбэх төгүллээх чемпиона уонна призера этэ. Россия сүүмэрдэммит хамаандатыгар киирэн, тыа сирин саахымачыттарын Бүтүн Союзтааҕы күрэхтэһиилэрин финалыгар 4-тэ кыттыбыта. Кини бэйэтэ туспа суоллаах-иистээх мындыр оонньооччу быһыытынан биллэрэ.

Михаил Куприянович дэгиттэр талааннааҕа. Чычымахха олорон холкуос бастыҥ үлэһитэ этэ, оройуоҥҥа спортивнай күрэхтэһиилэри тэрийээччи быһыытынан эмиэ биллибитэ. Ону таһынан бэйэтэ дьарыктанан уһун дистанцияҕа сүүрүүгэ күрэхтэһэн ситиһиилэнэр этэ. Кини «Урожай» общество оройуоннааҕы сэбиэтин бэрэссэдээтилинэн, ити общество уобаластааҕы сэбиэтин бэрэссэдээтэлинэн, ити общество уобаластааҕы сэбиэтин инструкторынан үлэлээбитэ. Ол сылдьан техник-геодезист идэтигэр үөрэнэн, Сахабыт сирин аар тайҕатын уһаты-туора сыыйбыт үлэһит бэрдэ этэ. 1969 с. “Урожай” общество тренеринэн ананан Намҥа үлэлии барбыта. Ити сылдьан Саха сирин сүүмэрдэммит хамаандатын салайан, үгүс күрэхтэһиилэргэ кытыннаран, үрдүк ситиһиилэргэ сирдээбитэ. Кини үөрэппит оҕолоро А.Афанасьева, П. Львова, А. Протодьяконова, Е. Эверстова республика хас да төгүллээх чемпионнара буолбуттара. Михаил Куприянович 1970 сылтан ылата барыта 20 сыл устата саахымат тренеринэн үлэлээбитэ. Ол үлэтин түмүгэ ордук 1981 с. Намнааҕы оҕо спортивнай оскуолата аһыллыаҕыттан көстүбүтэ. Кини оҕо тренерэ эрэ буолбакка бүтүн оройуон, республика улахан дьоҥҥо сүүмэрдэммит хамаандатын дьиҥнээх лидерэ, уларыйбат капитана этэ.

Саха Республикатын үтүөлээх тренера, Нам улууһун Бочуоттаах гражданина.

Т.Д. Бочорукова. «Таатта-2019: ытык-бэлиэ күннэр», 10-11 стр.

1953 с. Афанасьев В.К. капитаннаах Саха сирин хамаандата V Бүтүн Россиятааҕы турнирга  Дьокуускайтан Улахан Невергэ диэри почта таһаҕас массыынатынан айаннаабыттар. Улахан Невертэн Новосибирскайга поеһынан айаннаан иһэн: «И.В. Сталин өллө», диэн кулун тутар 5 к. истибиттэр.

Хаартыскаҕа: Саха сирин хамаандата. Тураллар: уҥаттан Михаил, Владимир  Афанасьевтар (Таатта), Геннадий Никифоров (Хаҥалас), Гаврил Босиков (Уус Алдан), уҥаттан бастакы Александра Ефремова олорор. Новосибирскай, 1953 сыл.

 «Саахымат хонууларын тула сахалар ыллыктара», 113 с.

Дьулурҕа», 22.05.2007.