1 Star2 Stars3 Stars4 Stars5 Stars (No Ratings Yet)
Загрузка...
130 views

Малышев Еремей Порфирьевич

Малышев

Еремей

Порфирьевич

(1892-1987)

Төрөөбүт аата Канаев Еремей Васильевич, иитиллибитинэн Малышев Еремей Порфирьевич. Иипит аҕата сэниэтик олорбут. Еремей Порфирьевич кэргэнэ Малышева Анна Терентьевна 1898 с. төрүөх. Кинилэр 1916 с. холбоспуттар. Оҕолоро: Елена Еремеевна, Наум Еремеевич, Егор Еремеевич. Олорбут сирдэрэ –Үөттээх алааһын баһыгар Тараҕайга эбит. Ити сир  «Дьэрибиэй Үөттээҕэ» дэнэр. Еремей Порфирьевич бастакы табаарыстыбалар, колхозтар тэриллиэхтэриттэн производствоҕа үлэлээбит. Холкуоска, артыалга бастакынан киирбит. Кыhынын бултуур, сайын оттуур, хонуу биригэдьииринэн үлэлиир эбит. 

1929-1930 сс. – нэһилиэк Сэбиэтин бэрэссэдээтэлэ. 1931 с. Сэбиэт сэкэритээрэ Афанасьев И. Н. оройуон прокатнай пуунуттан хас да булуугу, икки от охсору, от мунньар  массыынаны киллэрбит.  Еремей Порфирьевич бастакынан от охсор массыынаҕа олорбут. Сайын устата Миронов Николайдыын «Буолуманы», «Арыылааҕы», оскуола аннын, кытылы барытын оҕустараллара. Кини революция быдан инниттэн, бэйэтэ ахтарынан, 1909 с. ыла булчутунан баайдарга наймыламмыт. Бастакы булда – 12 сааhыгар кыhыл саhыл эбит. 12- тэн  82 сааhыгар дылы бултаабыт.   Бултуур тэрилэ айа, чааркаан. Сатыы хайыhарынан сылдьан тайах, кырынаас, тииҥ, солоҥдо бултуура үhү. Түбэстэҕинэ бѳрѳ, бэдэр, сиэгэн. Лааскайы бултаабат эбит. Оччолорго киис, саhыл сэдэх булт эбит. Кэлин харпкаанына, туунан андаатардаабыт. Дьиктитэ диэн биир да тыыннаах эhэни кѳрбѳтѳх, бултаспатах. Кырдьаҕас кини үүтээнин тыыппатах. Бултуйаары гыннаҕына түүлүгэр сиэтэн илдьэн хааны тэбистэрэллэр үhү.

Бултуур сирдэрэ- Тѳҥүттэ үрэҕэ, Атаах, Арҕаа үрэх, Кубалаах, Мас Аппа, Ноху үрэҕэ. Таас үрэххэ тийэ баран бултуур эбит. Бастаан андаатара ыытаннар үөскүүрүн саҕана Алдаҥҥа, Чаппандаҕа бултуура.Ол диэки киис, урут ааттыылларынан саарба, тииҥ бултуура үhү. Холобур, Чаппандаҕа «Дьэрибиэй күөлэ» диэн баар. Билигин Ярославскай музейыгар турар тигр суолун илэ кѳрбүт. Саллан суолласпатах. «Этэрбэстээх киhи атаҕын суолун саҕа суоллаах. От күрүѳтүн үрдүнэн түhэр, икки арда иккилии саhаан ойор» — диэн кэпсиирэ. Бултаабытын ттухары былаанын толорботох сыла суоҕа. 1952 с. 1 кварталлаах сорудаҕын уола Егордуун 4775 солк. бултаан 350 % толорбутун туһунан «Коммунист» хаһыакка сырдатыллыбыт. 1959-1967 сыллардаахха былаанын 184-286% толорбута. 

Еремей Порфирьевич үлэ, тыыл ветерана «1941-1945 сс. Аҕа дойду сэриитин кэмигэр килбиэннээх үлэтин иhин», Кыайыы 30, 40 сыллардаах мэтээллэринэн, «Туйгун булчут» бэлиэнэн наҕараадаламмыта.