ТАРБАХОВ ИННОКЕНТИЙ ИННОКЕНТЬЕВИЧ Россия эргиэнин үтүөлээх үлэһитэ

          Россия маастар-повара И.И. Тарбахов 1944 сыл кулун тутар 8 күнүгэр Амма нэһилиэгэр төрөөбүтэ. Төрөппүттэрэ эрдэ өлөн, тулаайах хаалбыта, Уолба, Дириҥ, Ньурба детдомнарыгар иитиллибитэ. 1962 с. сэттэ кылаастаах оскуоланы бүтэрэн, Нам сэлиэнньэтин остолобуойугар үөрэнээччи-поварынан үлэлии киирбитэ. 1963-1965 сс. эргиэн-кулинарнай училищетын ситиһиилээхтик бүтэрбитэ. 1965-1968 сс. Челябинскай куоракка армияҕа сулууспалаабыта, үөрэхтээх буолан остолобуойга асчытынан анаабыттара.

            Армияттан кэлэн баран, салгыы Нам остолобуойугар 1993 с. диэри үлэлээбитэ. Кэтэхтэн Дьокуускайдааҕы эргиэн техникумун бүтэрэн, общественнай аһылык технолога буолбута. Саха төрүт аһын астааһыҥҥа, ону дэлэтиигэ үлэлэспитэ. Республика биллэр журналиһа Т.Т. Халыев сүбэтинэн 1986 с. «Эн остуолуҥ сахалыы астара» диэн маҥнайгы кинигэтин таһаартарбыта. Иннокентий Иннокентьевич телевизорынан, радионан кэпсээн, рецептэрин хаһыакка, сурунаалга таһаартаран, улуустары кэрийэ сылдьан маастар-кылаастары ыытан, Москваҕа, Россия араас куораттарыгар, тас дойдуларга саха аһын пропагандалаан элбэх үлэни ыытар. 1993 сылтан Саха Республикатын бастакы Президенэ М.Е. Николаев ыҥырыытынан дипломатическай, протокольнай приемнарга саха төрүт аһын остуолун тэрийээччи буолар. «Тыгын Дархан» ресторан инженер-технологынан үлэлиир. 1996 сылтан Тарбаахап авторскай оскуолатын аһан үлэлэтэр. Саха телевидениетыгар «Тарбаахаптыын астыахха» норуот кэрэхсээн көрөр биэриитин ыыппыта.

             Российскай Федерация эргиэнин үтүөлээх үлэһитэ, Саха Республикатын норуотун хаһаайыстыбатын үтүөлээх үлэһитэ, потребительскай кооперация туйгуна, СР орто анал үөрэхтээһинин туйгуна. Россия уонна норуоттар икки ардыларынааҕы кулинарнай искусство конкурстарын элбэх төгүллээх лауреата. Таатта уонна Нам улуустарын Бочуоттаах гражданиннара.