1 Star2 Stars3 Stars4 Stars5 Stars (No Ratings Yet)
Загрузка...
135 views

Андросов Павел Павлович

Андросов Павел Павлович

(1962-2000)

Биһиги аҕабыт Андросов Павел Павлович 1962 сыллаахха от ыйын 19 күнүгэр Алексеевскай оройуон Чөркөөх нэһилиэгэр Анна, Павел Андросовтар эдэр ыалга бастакы уол оҕонон күн сирин көрбүтэ. Амма нэһилиэгэр улаатан, олохсуйан,ыал буолан, оҕолонон, үлэлээн-хамсаан ааспыта.

1979-1981сылларга совхозка ыанньыксытынан үлэлээбитэ. Аан бастаан нэһилиэгэр фермаҕа эр дьону үлэлэтэргэ тыл көтөхпүтэ, көҕүлээбитэ. Үлэттэн туора турбакка, бэйэтэ бастакынан холобур буолбута. Ол курдук «Коммунизм» совхозка Павел Павлович салайааччылаах, сэттэ буолан “Аргыс” ыанньык ферматын тэриммиттэрэ. Манна үлэлиир сылларыгар 110 уулаах тиҥэһэни тутан, үрдүк таһымнаах үлэни көрдөрбүттэрэ. Биир сыл биирдии ынахтарыттан 2117 кг үүтү ыан, оройуоҥҥа уолаттар икки ардыларыгар ыытыллыбыт куоталаһыыга кыайыылааҕынан тахсыбыттара.

1981-1982 сылларга ытык иэһин төлөөн, Новосибирскай куоракка армияҕа сулууспалаабыта.1983-1985 сылларга Дьокуускай куоракка тыа хаһаайыстыбатын техникумугар үөрэнэн, бригадир-зоотехник идэтин баһылаабыта.1985-1994 сылларга сүөһү биригэдьииринэн, 1994-2000 сылларга сылгыһыт биригэдьииринэн, орто звено салайааччытынан үлэлээбитэ. Павел Павлович саха ата кыахтааҕын көрөн, боруоданы тупсарыыга үлэлээн, элбэх сыратын биэрбитэ. Дойдутугар эрэ буолбакка, үс Амманан (Чычымах, Харбалаах, Чымынаайы)нэһилиэктэригэр бу боппуруоһу көтөҕөрө, үлэлэтэрэ.Амма, Томпо, Өймөкөөн, Чурапчы, Уус Алдан улуустар сылгыһыттарын кытта күүстээх үлэ, уһун кэпсэтии ыытан, боруода тупсарар сыаллаах бу улуустартан сылгылары тиэйэллэрэ. Павел Павлович ситиһииллээх, таһаарыылаах үлэ буоларыгар саҥа методтары киллэрэри, туһанары өрө тутара.

Сүрүн үлэтин таһынан аҕабыт общественнай үлэҕэ инники күөҥҥэ сылдьара. Ол курдук Амма нэһилиэгин сельскай сэбиэтин депутатынан талыллан, өр сыллар устата үлэлээбитэ. Маны таһынан районнай совет депутатынан талыллан, тыа хаһаайыстыбатын, коневедство конференцияларыгар делегат буолан, үрдүк трибунаттан тыын боппуруостары туруорсара.

Үлэлии-хамсыы сылдьан, баара суоҕа 38 саастааҕар 2000 сыл  сэтинньи 19 күнүгэр сырдык тыына быстыбыта. Былырыын 2016 сыл кулун тутарыгар Дьохсоҕон нэһилиэгин дьаһалтата сааскы ат сүүрдүүтүн тэрийэн,  аҕабыт аата ааттаммыта. Таһаҕас тардыы күрэҕи сөргүтэн, Павел Павлович аатынан кыайыылаахха бириис туттарар чиэһи биэрэн, үөрүүбүт үрдээбитэ. Быйыл төрөөбүт дойдутугар Чычымахха төрөөбүтэ 55 сылыгар, улуустааҕы ат сүүрдүүтүгэр аата ааттанарын долгуйа күүтэбит.

Павел Павлович кэргэнэ Лариса Лазаревна Андросова билигин Тулагы-Киллэм нэһилиэгэр олорор. Библиотека сэбиэдиссэйинэн үлэлиир. Оҕолоро 4 кыргыттара үөрэхтээх, үлэһит дьон. Улахан кыыс ЕвгенияДавыдова журналист идэлээх, «Саха» НКИК компанияҕа продвижение отделын начальнигынан үлэлиир. Ыал буолан,биир уол оҕолоох. Иккис кыыс Галина Гаврильева нуучча тылын уонна литературатын учуутала идэлээх. Тулагы-Киллэм оскуолатыгар учууталынан үлэлиир. Ыал буолан, үс кыыс оҕо тапталлаах ийэтэ. Үһүс кыыс Анна Семенова английскай тыл учуутала идэлээх. Хаҥалас улууһун Улахан Аан «Кыымчаан» уһуйааныгар английскай тыл преподавателинын үлэлиир. Ыал буолан биир уол оҕолоох. 2016 сылга Республика бастыҥ иитээччитин аатын сүкпүтэ. «Россия бастыҥ иитээччитэ» күрэххэ Саха Сириттэн ситиһиилээхтик кыттыбыта, смс куоластааһын кыайыылааҕа буолбута. Кыра кыыс Павлина Андросова  ХИФУ 3 курсун устудьуона, биолог идэтин баһылаары үөрэнэ сылдьар.

Андросов П.П. улахан кыыһа Евгения Давыдова. 2017 с.