1 Star2 Stars3 Stars4 Stars5 Stars (No Ratings Yet)
Загрузка...
129 views

Афанасьев Степан Иванович

Афанасьев Степан Иванович

(1948-2015)

1948 с. ахсынньы 14  күнүгэр Амма нэһилиэгэр төрөөбүтэ. 1965 с. ахсынньы 1 күнүгэр «Коммунизм» совхозка рабочайынан үлэҕэ киирбитэ. 1967-69 сс.  дылы армияҕа сулууспалаан кэлбитэ. 1969 с. ахсынньы 25 күнүгэр «Коммунизм» совхозка сылгыһытынан үлэҕэ киирбитэ. Пенсияҕа тахсыар дылы төрөөбүт совхоһугар сылгыһытынан үлэлээбитэ. Трудовой кинигэтигэр сыччах биир эрэ строка баар. Онтон атына «Коммунизм» совхоз, КП «Харбалаах», онтон СХПК «Харбалаах»,  СХПК «Чычымах» буолбутун туһунан бэлиэтээһиннэри аахпатахха. 41 сыл устата Чычымахтан 3 көстөн ордуктаах «Учай» сиригэр олорон аһаҕас халлаан анныгар ахсынньы-тохсунньу аам-даам тымныыларыгар төһөлөөх сыратын-сылбатын биэрэн дьөһөгөй оҕотун көрөн-истэн, улаатыннаран, үлэлээн ааспыта буолуой? Совхоз саҕана Чычымах отделениетыгар 700-тэн тахса сылгы баар буола сылдьыбыта. Оччолорго кэтэх хаһаайыстыбаҕа сылгы тутуллубат этэ. Баар сылгы барыта совхоз бас билиитэ буолара. Киэҥ сирдэринэн тэлэһийэн сылгыны көрүү-истии улахан үлэттэн тахсара. Биир күн өрөөбөккө, биир уоппусканан, биир больничнайынан туһаммакка 41 сыл устата наар биир үлэҕэ сылдьан, үтүө суобастаахтык үлэлээн, тыа хаһаайыстыбатын производствотын сайыннарыыга кылаатын киллэрбитин элбэх ахсааннаах махтал суруктара туоһулууллар. Ол курдук, оннооҕор 7  кылааска үөрэнэ сылдьан хайҕал грамотатынан наҕараадалламмыт. Бу кини оҕо эрдэҕиттэн үлэҕэ кыһамньылааҕын, эппиэтинэстээҕин көрдөрөр. Сылгы звенотугар звеньевод Иванов П.П. салалтатынан элбэх киһи сылгыһытынан үлэлээн ааспыта. Үрдүк ситиһии да ылыллыбыта, бэйэлэрин үлэлэрин таһынан сайын от звенотугар эмиэ үтүө суобастаахтык үлэлииллэрэ, хайҕалга сылдьаллара. Звеноҕа үлэлии сылдьан элбэхтэ биэнэн, харчынан бириэмийэлэммиттэрэ. Степан Иванович «Москвич» массыына фондатынан наҕараадаламмыта. Өр кэмҥэ, үйэтин тухары олоро үөрэммит сиригэр «Учайга» сылын аайы сайылыыр этэ. Бииргэ алтыспыт доҕотторо, үөлээннээхтэрэ, билэр дьоно «Учай кырдьаҕаһа» диэн ааттыыллара. 2009 с. Тыа хаһаайыстыбатын миниистирин 307№-х прикаһынан «Тыа хаһаайыстыбатын ветерана» бочуоттаах бэлиэнэн наҕараадаламмыта.