1 Star2 Stars3 Stars4 Stars5 Stars (No Ratings Yet)
Загрузка...
100 views

Богдокумов Алексей Васильевич

Богдокумов Алексей Васильевич

(1956-2022)

Мин, Богдокумов Алексей Васильевич, 1981 сыллаахха күһүн хаар түспүтүн кэннэ, эмискэ баҕайы сылгыһыт буолан хаалбытым. Бу иннинэ управляющай Софронов Роман Иванович миигин опыттаах сварщикка Карсанаев Прокопий Прокопьевичка «Күөнэхтээх» ферматын систематын ремонугар көмөлөһөөччүнэн анаабыта, Биир күн Боохойдуун дьиэбитигэр эбиэттии кэллибит. Мин арыый эрдэлээн хонтуора дьиэҕэ кэлбитим табаарыһым Иванов Поликарп Поликарпович -«Карпуш» сылдьар эбит. Миигин көрөөт: « Оо, быраатым сылгыһыт буол, «Учайга» убаһата баран аһатан кыстаа» — диэтэ. Мин аккаастамматым, онон эбиэттэн киэһээ сылгыһыт буолан хааллым. Киһим Карпуш үллэрэҥнэтэн хамнаспын аахтарда, ыскылааттан ыҥыыр ылан биэрдэ түргэн баҕайытык уонна «Мэйи-Баалыга тахсыахпыт убаһа ааҕа» — диэтэ. Ол кэмҥэ дьэ Боохойум тиийэн кэллэ. Арай көрбүтэ киһитэ ыҥыыр кыбынан баран Карпуш кэнниттэн сүүрэ сылдьар үһү, ону: «Хайа доо доо хайдах буоллуҥ?»- диэтэ. «Ээ, мин сылгыһыт буоллум, эйиэхэ үлэлээн бүттүм» — диэн буолла. Онон, дьэ Иванов Поликарп Поликарпович биригэдьиирдээх, Налыяхов Семен Васильевич, Афанасьев Степан Иванович, Керемясов Николай Иванович уонна мин састааптаах сылгыһыттар биригээдэлэрэ буоллубут. Ол сыл кыһыныгар мин Учайга 140-ча убаһаны аһатан кыстаппытым. Уолаттар кэлэ-бара сылдьар этилэр. Онтон кэнники Старостин Куприян Петрович эбии киирбитэ.  Дьэ бу састаабынан өргө диэри бары бииргэ наһаа үчүгэйдик, эйэлээхтик үлэлээбиппит. Бары да сылгыны биэс тарбах курдук билэр убайдар этилэр. Ордук Карпуш киһи бэркиһиир гына чуолкай ханнык үөр биэтэ буоларын, хас саастаахтарын олох сыыспат этэ. Уопсайынан, Ивановтар айылҕаттан сылгыга-сүөһүгэ сыстаҕас дьон.

Бу сылгыга үлэлээбит сылларбар саамай улахан ситиһиибит, сылын умнубуппун, 1984 эбэтэр 1985 сыллардаахха 87,5 % төрүөх ылбыппыт, инньэ гынан түөртүү убаһаны эбии төлөбүр диэн хаамтаран ылбыппыт. Уус-Тааттаҕа сылгыһыттар слеттарыгар баран кэлбиппит. Кэнники да куһаҕана суох төрүөҕү ылар этибит.

Хас сайын аайы бары куустуспутунан Учайга оттуу барар этибит көлө звенотугар. Манна дьэ саамай кылаабынайбыт Софронов Иван Пантелеймонович буолар этэ. Хайа да бэйэлээх аттары көлүйэн дьэ оҕустарар этэ. Онтон мин 1987 с. күһүнүгэр уурайбытым.

Ахтыыны суруйдум Богдокумов Алексей Васильевич.

1.03.2017