1 Star2 Stars3 Stars4 Stars5 Stars (No Ratings Yet)
Загрузка...
117 views

Иванов Поликарп Поликарпович

Иванов Поликарп Поликарпович

 

Биһиги аҕабыт Иванов Поликарп Поликарпович үлэни өрө туппут, айылҕаттан айдарыылаах, сүрэхтээх, үлэһит киһи этэ. 1977 с. «Коммунизм» совхоз Чычымах отделениетын управляющайа Е.В. Захаров ыҥыран 23 сааһыгар сылгыһытынан үлэҕэ киирбитэ. Кини үлэҕэ киирэригэр Софронов Куприян Иванович биригэдьиир этэ. Оччотооҕу үлэлиир эдэр сылгыһыттарга үлэлэригэр бэриниилээх, мындыр аҕа табаарыстара Прокопьев В.К., Налыяхов С.В. үлэҕэ холобур буолбуттара. Сылгыһыт үлэтэ биир уоппуската, өрөбүлэ суох ыарахан үлэ.  Кыһынын кэтээн аһатыы, хаардааһын, сааһын төрүөхтэрэ, сайынын отторо, күһүнүн убаһалары араартааһын, аһылыкка киллэрии. Софронов К.И. бочуоттаах сынньалаҥҥа барбытын кэннэ сылгыһыттар биригээдэлэригэр биригэдьииринэн ананан үтүө суобастаахтык билиитин, сатабылын ууран туран үлэлээбитэ. Кинини кытта бииргэ Налыяхов С.В., Афанасьев С.И., Старостин К.И., Богдокумов А.В., Табунанов Р.Н., Софронов И.П. биир санаанан салайтаран таһаарыылаахтык үлэлээбиттэрэ. Чычымах биир саамай кэрэ көстүүлээх сиригэр Учайга база туттубуттара, «Мэйи Баалын» күрүөлээбиттэрэ, сылгы турар хааччахтарын оҥортообуттара. Хас сайын аайы элбэх тонна үрдүк хаачыстыбалаах оту бэлэмнииллэрэ. Күһүөрү алаастары кэрийэн мэччирэҥэ төһөтүн, хайдаҕын, отунан турар сылгылар төһөнөн кыһыны туоруохтарын сөбүн эрдэттэн ааҕынара, бэлиэтэнэрэ, былааннанара. Сылгы боруодата тупсарыгар улахан болҕомтотун уурара. Хаан уларытаары Өймөкөөнтөн атыыр сылгылары аҕалтаабыта.

 

Оччотооҕу совхоз директордара Васильев П.И., Денисов М.М., управляющайдар Васильев Н.С., Софронов Р.И., Афанасьев Д.Е., Тистяхов И.И. сылгыһыттарга улахан болҕомто уураллара, кыһалҕаларыгар көмөлөһөллөрө. Ол сыралаах үлэлэрэ үрдүк түмүктэрдээх буолара, сылтан сыл аайы көрдөрүүлэрэ үрдээн иһэрэ. 1988 с. үрдүк төрүөҕү ылары ситиһэн биригээдэнэн Москваҕа ВДНХ-ҕа барар путевканан наҕараадаламмыттара. 1990 с. үлэтигэр үрдүк ситиһиилэнэн «Жигули» массыына фондатынан наҕараадаламмыта. Хас сыл аайы Тыа хаһаайыстыбатын күнүгэр хайҕал суруктарынан, сыаналаах бэлэхтэринэн бэлиэтэнэллэрэ.

Ат сүүрдүүтүгэр эмиэ кыттыһан бэйэтэ сатыырынан аттары баайан, тренер Рожин Романы ыҥыран көмөлөөн аттары баайаллара. Мэҥэҕэ, Аммаҕа баран ат сүүрдэ сылдьыбыттара. Атын улуус сылгыһыттарын кытта ыкса сибээстэһэ, хардарыта бэйэ-бэйэлэригэр көмөлөсүһэ, сүбэлэһэ сылдьаллара. Үгүс элбэх доҕордооҕо, табаарыстааҕа.

Нэһилиэгин ыһыаҕар анаан кымыс, үтэһэлээх эт оҥороллоро. Варламова Тамара Петровна сылгыһыттарга көмөлөһөн биэлэри ыан бэрт минньигэс кымыс оҥороро. Ыһыах иннинээҕи киэһэ түмсэн эт буһарыыта, үтэһэҕэ үөлүү биир үтүө үгэс этэ. Күһүн Өктөөп саҕана убаһа өлөрөн нэһилиэк олохтоохторугар түҥэтэллэрэ. Ол үтүө үгэһи билигин даҕаны үгүс киһи истиҥник ахтар.

Поликарп Поликарпович нэһилиэк мунньаҕын депутата этэ. Үлэтиттэн ордон нэһилиэк бары общественнай олоҕор кыттара, кырдьаҕастарга, элбэх оҕолоох ыалларга күүһэ кыайарынан көмөлөһөрө. Оччотооҕу зона үлэтин күрэхтэһиилэригэр бириэмэлээх буоллаҕына мэлдьи кыттара, тэрийсэрэ.

Кини олоҕун оҕолоро, сиэннэрэ салҕыыллар. Аҕалара, эһэлэрэ үлэҕэ бэриниилээҕин, айылҕаны таптыырын, байанайдаах булчутун истиҥник ахталлар, саныыллар.

                                              Кэргэнэ Иванова Евдокия Петровна, СР үөрэҕириитин туйгуна, РФ үөрэҕириитин бочуоттаах үлэһитэ, «Майа-дойдум барахсан» бэлиэ хаһаайката.