1 Star2 Stars3 Stars4 Stars5 Stars (No Ratings Yet)
Загрузка...
113 views

Старостин Куприян Петрович

Старостин Куприян Петрович

(1952-2009)

Таатта оройуонун, билиҥҥитинэн Томпо оройуонун ΙΙ Алдан нэһилиэгэр Охотскай Перевозка, Мас –Аппаҕа 1952 с.  балаҕан ыйын 23 күнүгэр күн сирин көрбүтэ. Оскуолаҕа 1960 с.  киирбитэ, бастакы учуутала Анастасия Куприяновна Андреева этэ. Кыра сааһыттан сайыҥҥы каникулугар оҕус муннун сиэтэн окко үлэлээн, онтон устунан атынан от мустаран, оҕустаран улааппыта. 1968 сылтан «Коммунизм» совхозка үлэҕэ киирбитэ. Ити сайын 16 эрэ саастаах оҕону ыраах экспедицияҕа конюҕунан анаабыттара. Экспедиция начальнига кып-кыра оҕону биэрдилэр диэн атын киһини туруорса сатаабытын буолумматахтар. Күһүн сэтинньи ыйга бүтэн кэлбитэ, онтон ыла совхозка борон, субан сүөһү аһатан сылдьыбыта. 1971 с. сэтинньи ыйга армияҕа ыҥырыллан барбыта уонна 1973 с. күһүн сержант званиелаах кэлбитэ. Кэлэн баран Малышев Егор Порфирьевич биригээдэтигэр киирэн бороон көрөннөр республикаҕа хас да төгүллээх чемпион буолан аатырбыттара. 1976 сылтан сылгыһытынан үлэлээбитэ. Бу үлэтигэр эмиэ элбэхтик үчүгэй көрдөрүүлэри ситиспиттэрэ. Афанасьев Степан Ивановичтыын 2009 с. диэри бииргэ үлэлээбиттэрэ.

Дьоҥҥо үчүгэй сыһыаннаах, аһыныгас, эйэҕэс майгылаах этэ. Бэйэтэ төһө да оҕото суоҕун иһин сиэн племянниктарын барыларын үлэҕэ уһуйан, уолаттары борбуйдарын көтөхпүттэрин кэннэ булка-аска, сылгыга сыһыаран үлэлэтэрэ уонна эппит тылын хайаан да толортороро. Сиэн кыргыттарын наһаа атаахтатара. Победаҕа тиийэ баран оҕо көрсөрө, сиэн племянниктарын, племянницаларын наһаа таптыыра. Оҕо көрсөн, хаһаайыстыбаны дьаһайсан олорбута, инники элбэх былааннардаах этэ. Хомойуох иһин, баара суоҕа 57 сааһыгар олус хомолтолоохтук ыарахан ыарыыттан өлөн туораабыта. Баара буоллар билигин да кимиэхэ дьиэ көрсөн, оҕо көрсөн, хаһаайыстыба тэрийсэн, сүбэ-ама, өйөбүл буола сылдьыа этэ. Аймахтара бары наһаа суохтуубут, ахтыбатах күммүт диэн суох, кырдьаҕас баара буоллар туох диэ этэй… диэн буолар.

Быраата Старостин Петр Петрович