1 Star2 Stars3 Stars4 Stars5 Stars (No Ratings Yet)
Загрузка...
30 views

Лопатина (Готовцева) Валентина Владимировна

Күһүн, 1980 сыллаахха буолуо дуу, Чычымах олохтоохторо бары күүппүт  саҥа кулууптара субу үлэҕэ киирээри турдаҕына киномеханиктыы тиийбитим. Эргэ таҥара дьиэтигэр үлэлии турбут кулууп тохтообут, малларын салларын көһөрө сылдьаллара. Хаар түспүтүн кэннэ саҥа улахан киноаппараттары туруоран олохтоох киномеханик Хоноехов Василий Дмитриевич наставниктаан үлэбин саҕалаабытым. Василий Дмитриевич киномеханик быһыытынан өр үлэлээбит, баай уопуттаах, Алексеевскай оройуон биир тарбахха баттанар, киномеханик үлэтин толору баһылаабыт убаастанар специалиһа буоларын хара бастакыттан бииргэ үлэлээн билбитим. Саҥа киноаппараты хайдах холбуурга көрдөрөн үөрэтэн, эдэр үлэһиккэ эрэнэн туттаран,  кини бардаҕына кэллэҕинэ сотору аппараты бэйэм үлэлэтэр киинэни көрдөрөр буолбутум.

Василий Дмитриевич наһаа активнай позициялаах, үлэтин наһаа таптыыр, бэриниилээх ырыанан сылдьан үлэлиир үлэһит этэ. Үлэҕин таптыыр, айымньылаахтык үлэлиир буоллаххына үчүгэй үлэһит буолаҕын диирэ. Түргэн тарҕан, ыраас тутуулаах,  куруук сууйа сото, быыллыы сылдьара. Саҥа аппарааты харыстыыра, уһун үйэлээх буоларыгар кыһаллара. Оччолорго каассабай киинэлэр диэн бааллара, дьон бары кэтэһэр, элбэх көрөөччүнү хабар киинэлэри үс Аммаҕа аан бастаан  Чычымах кулууба көрдөрөр этэ. Ыйдааҕы былааны аһары толорон элбэхтэ премияланарбыт. Василий Дмитриевич сүрдээх түргэн ыраас туттунуулаах, электричество өттүгэр үчүгэйдик быһаарсар, сахалыы мындыр өйүнэн оҥоро охсон биир да саахалы таһаарбакка таптыыр киинэ көрөөччүлэрин үөрдэн күн аайы кулуупка киинэ көстөрүн хааччыйара. Дьон да киинэ көрөргө үөрэнэн куруук кулууп иһэ толору киһи буолара. Саҥа кулууп үлэҕэ киирэн, культура үлэтэ күөстүү оргуйара. Онно барытыгар Василий Дмитриевич көҕүлээһининэн кулууп ыытар бары үлэтигэр активнайдык кыттарбыт. Саҥа дьылга утренник ыыппыппытын өйдүүбүн, онно Василий Дмитриевич Дед Мороз буолан оҕолорго оонньуу көр бөҕө тэрийбитэ, подарок бөҕө бэлэхтээбитэ.

Сайынын сайылыктарга, отчуттарга Урал мотоцикллаах этэ, онон тиэллэн киинэ бөҕө көрдөрбүппүт. Бэйэтин көлөтүнэн, бензининэн куһаҕан суоллаах, туох да сылдьыбат сирдэринэн айаннаан киинэ көрдөрөн элбэх дьон махталын ыларбыт. Амма кэрэ миэстэлэрин, айылҕатын көрдөрөн, кэпсээн элбэх саҥаны көрбүтүм, билбитим.

Үлэлиир кэммэр Василий Дмитриевичтаахха бэйэлэригэр дьиэлэнэн олорбутум. Кэргэнэ Анфиса наһаа минньигэс астаах бастыҥ дьиэ хаһаайката этэ. Бэйэ бэйэлэригэр эйэҕэс, иллээх сыһыаннаахтара, оҕолорун дьиҥ сахалыы, үлэҕэ үөрэтэн бэйэлэрин холобурдарынан иитэллэрэ биллэрэ. Наһаа бэрээдэктээх, эйэҕэс, үлэһит, киһиэхэ үчүгэйдик сыһыаннаһар оҕолор этилэрэ. Василий Дмитриевич киһи быһыытынан судургу, дьиэ кэргэнигэр эйэҕэс, аһыныгас сыһыаннаах, наһаа үлэһит, ырыанан  сылдьар киһи этэ. Онон, Василий Дмитриевиһы кытта бииргэ үлэлээбиппин, киниттэн олоххо, үлэбэр элбэххэ үөрэммиппин төрүт умнубаппын, олохпор холобур оҥостубут киһибин.

Сылтан ордук үлэлээн баран Харбалаахха солбук миэстэ тахсан онно көспүтүм. Төрөөбүт оройуонум элбэх нэһилиэктэригэр киномеханигынан үлэлээн баран 1984 сылтан идэбин уларытан бухгаалтар идэтигэр үөрэнэн пенсияҕа тахсыахпар дылы сбербааҥҥа үлэлээн,  онон пенсияҕа тахсан олоробун.

Ахтыыны оҥордум Готовцева Валентина Владимировна.  Алтынньы 2024 сыл