Эдьиий Дуня

Биһиги Биэбэйиккэ олорорбут, бэрт дьадаҥытык, аһыыр-аһаабат икки ардынан. Маачаха аҕабыт элбэх оҕолоох этэ. Ол курдук, Афанасий Аҕа дойду сэриититтэн бааһыран кэлэн өр буолбатаҕа, барбыта. Сиэҥкэ Васильевтарга иитиллибитэ. Малышева Еляны ылан 11 оҕолонон, Чычымах бас-көс ыала буолан олордулар. Бүөтүр Аҕа дойду сэриитигэр баран төннөн кэлэн Сайдыыга кэргэн ылан 10 оҕолонон, сүөһү үлэһитэ буолан оҕолорун ииппитэ. Иван диэн уола салайар кадрдарга үөрэнэн колхозка манна агрономнаан иһэн Охотскай Перевозка баран булчуттаабыт. Икки кыыс эрдэ барбыттар этэ..  Онтон биһиги ийэбитин ылар. Ийэбит колхозка кладовщик этэ. Онон син олордохпут.

Дуня бастаан Васильева Ааныскалаахха Төҥүттэҕэ олорбута. Ийэтин дьонугар кэлин кэлбитэ. Оскуолаҕа бииргэ сылдьарбыт. Онтон кини борбуйун саҥа көтөҕөн иһэн үөрэхтэн тохтообута. Кыра эрдэҕиттэн сүөһүгэ сыстаҕас этэ. 15-16 сааһыгар колхозка үлэлии барбыта. Эдэр диэн үлэ саамай ыараханыгар, ырааҕар ыыталлара. Дуня төрөөбүт ийэтин батан сүрдээх аламаҕай, кэпсэтинньэҥ этэ.

Үлэлээбэтэх фермата суоҕа: Учайга, Уодайга брюцеллезтаах ынахтарга сотору-сотору барара. Онно Тааттаттан, Чымынаайыттан тиийэ кэлэллэрэ, үлэһит элбэх этэ. Үүтү да ыыллара.

Тараҕанаҕа, Дагдаайыга, Саппыйаҕа, Тыыттыга, Төҥүттэҕэ барытыгар ыарахан олох этэ.

Онтон салайааччы И.В. Николаев салалтатынан эдэр специалистар кэлбиттэрэ. «Ыччат-романтиката» фермаҕа тахсаллара. Онно Дуня старшай үлэһит, сүбэһит этэ. Опыттаах үлэһит элбэх эдэр ыччаты сүөһү иитиитигэр уһуйбута. Кинини олус убаастыыллара, сүбэһит, доҕор оҥостоллоро. Биир да кыһын дьиэтигэр кыстаабатаҕа. Эдэр ыччакка ийэлии истиҥник сыһыаннаһара.

Онтон Харбалаах туһунан отделение буолбута. Онно Калистрат Елисеевич управляющай этэ. Победаттан, Чычынаайыттан, Чычымахтан сүүһүнэн ынах, үлэһит Харбалаахха барбыттара. Биһигиттэн Угарова Анфиса, Дуня, Кычкиннар, Кулаковскай Лөҥкөлөөх барбыттара. 8 доярка Төҥүттэттэн барбыттара. Күһүн тоҥ хотону субботник бөҕөнөн сыбыыллара. Отделение үлэһиттэрэ, туох баар тэрилтэлэр үлэһиттэрэ бары хотон сыбаҕар тахсаллара. Ол курдук икки -үс сыл иһигэр 4 хотонунан 800 сүөһү буолбута.

Ленин төрөөбүтэ 100 сылыгар Дуняҕа ыарахан үлэҕэ үтүө суобастаах үлэтин иһин «Бочуот знага» орден биэрбиттэрэ.

Онтон дьонугар олороору Чычымахха көһөн кэлбитэ. Онно Тумулга, онтон Күөнэхтээххэ ферма старшайынан үлэлээбитэ. Элбэх ыччат үлэлиир улахан коллективыгар сүбэһит буолара.

Чарова М.С., Нюрова Т.Е. Татаринова М.А., Андросов П.С., о.д.а. истиҥник доҕордоһоллоро.

Доруобуйатынан ферма үлэтиттэн тохтоон пекарняҕа остуораһынан үлэлээбитэ. Биэкэр көмөлөһөөччүтэ- Михайлова К.В., биэкэр Канаев Н.А.этэ. Ол үлэтигэр пенсияҕа тахсыар диэри үлэлээбитэ.

Дуня олоҕун доҕорун Андросов Федот Яковлевиһы кытта холбоһон икки кыыһы иитэн, атахтарыгар туруоран, саҥа дьиэ туттан кырдьар саастарыгар быр-бааччы, дьоллоохтук олорбуттара.

Иванов Егор Пантелеймонович

7.10.2021