Попова Фекла Ивановна

1936 с. алтынньы 15 күнүгэр Игидэй нэһилиэгин «Түмсүү» холкуоһугар төрөөбүтүм. «Оҥхотой» диэн алааска олорбуппут. Улахан мастаах, немецкэй муннуктаах нуучча дьиэтэ баара. Билигин ол дьиэ Игидэй оскуолатын таһыгар турар турар.

Алдьархайдаах сэрии буолбутун араадьыйаттан истибиппит. Эр дьону хомуйан сэриигэ ыыппыттара, кырдьаҕастар, дьахталлар, оҕолор хаалбыппыт. Мин сэрии саҕаланыытыгар 4 саастааҕым.  Сэрии сылларыгар оҕолор дьоммутугар көмөлөһөрбүт. Кыһын муус түннүгү кыһыйар этибит, оччоҕуна балаҕаммыт иһэ сырдыыра. Киэһээ ыамҥа тахсыһан тымтык уматан тутарбыт. Саллааттарга ыытаары итии таҥас тигэллэрэ. Онно куобах тириитэ имитэн үтүлүк сирийэрбит. Ийэм фермаҕа быа хатар этэ, мин көмөлөһөн сиэл тыырарым, сааһылыырым. Кыһын оһоххо элбэх маһы оттоллоро, ол иһин улахан салааскаҕа масс тиэйэн аҕаллахтарына, оһох аттыгар сааһылыырбыт. Саас холкуоска хортуоска олордуутугар, сири паардааһыҥҥа оҕус сиэтэн көмөлөһөрбүт. Сайын ынах хомуйуу, ынах ыаһыы. Күһүн сонуокка тохтубут бурдугу хомуйан, холкуоска туттарар этибит.

Маҥнайгы кылааска үөрэнэр кэммэр, саас сылаас буолан, оскуола таһыгар оонньуу сырыттыбыт. Арай почта диэкиттэн куудара баттаҕа буралланнаан, сүүрэн-хааман нуучча Биэрэ барахсан иһэрэ уонна Кыайыы буолбутун туһунан үөрүүлээх сураҕы кэпсээбитэ. Онтон ыла үөрүү-көтүү буолбута, олох сайдан –тупсан испитэ. Ытык-Күөл орто оскуолатыгар 10-с кылааһы 1958 с.бүтэрбитим. Дьокуускай куоракка 1959 с. киномеханиктар оскуолаларын бүтэрэн, киномеханик идэтин ылбытым. Бастаан Чычымахха, онтон Игидэйгэ идэбинэн үлэлээбитим. Сайын отчуттарга, фермаларга көһө сылдьан көрдөрөрүм. Үлэһиттэр үөрэ-көтө көрсөн киинэҕэ көхтөөхтүк сылдьаллара. Ыйдааҕы, сыллааҕы былааммын аһары толорон бастыҥнар кэккэлэригэр сылдьарым. Оройуон грамоталарынан наҕараадаламмытым. Урут электрическай уот суох эрдэҕинэ мотуор үлэлэтэн көрдөрөр этибит. Моториһынан үтүө суобастаахтык Захаров Иван Иннокентьевич үлэлээбитэ. Комсомольскай тэрилтэ секретарынан, дьахтар советыгар үлэлээн общественнай үлэлэргэ кыттарым. Кэннэки Игидэй орто оскуолатыгар интернакка прачканан, оскуолаҕа поварынан үлэлээбитим. «Материнская слава», «Дети войны» мэтээллэрдээхпин, үлэ ветеранабын. 1962 с. Попов Владимир Семеновичтыын ыал буолан, 16  сиэннээхпин, 2 хос сиэннээхпин. Билигин оҕолорум, сиэннэрим үлэлэрин көрө-истэ олоробун. Телевизор, хаһыат сонуннарын сэҥээрэн көрөбүн, ааҕабын.

Ахтыыны суруйдум Ф.И.Попова. Сэтинньи 8 күнэ 2016 с.