«Таптыаҕыҥ ийэни» хоһооно 1967 с. дьахтар күнүн көрсө «Кыымҥа»  бэчээттэнэн тахсыбыта. Ол кэмҥэ мин Алдан куоратыгар райкомҥа үлэлиир этим.  Бу ырыаны биһиги олус астына аахпыппыт, улаханнык хайҕаабыппыт. Саха литературатыгар ийэҕэ аналлаах элбэх ырыа, хоһоон айыллыбыта. Олортон Эллэй «Таптыаҕыҥ ийэни» ырыата биир бастыҥнара уонна үйэлээхтэрэ.   Аатырбыт мелодистка, республика культуратын үтүөлээх үлэһитэ Ольга Иванова бу ырыа тылларыгар бэртээхэй мелодияны айан бу ырыа өлбөт үйэлэннэ»- диэн СР культуратын үтүөлээх үлэһитэ Егор Никифоров «Эһиги миигин өйдүөххүт» ыстатыйатыгар суруйбут. («Саха сирэ» хаһыат, 1994 с. сэтинньи). 

Борис Павлов Ольга Иванованы кытта «Таптыаҕыҥ ийэни» ырыа туһунан кэпсэтиитин ааҕабыт:

«- Онтон «Таптыаҕыҥ ийэни» диэн саамай саха дьонун тапталын ылбыт ырыаҕын хайдах суруйбуккунуй ?

-Оччолорго «Аҕабар» диэн ырыаны суруйбут киһи этим. Аны ийэбэр аналлаах ырыаны суруйуохпун баҕарабын да, олох сатаан тахсыбат. Урукку-хойукку хоһооннору ааҕабын. «Үргэл» диэн куруһуокка сылдьабын. Сорохтор наар ытыыллар, сорохтор аһары улахан формалаахтар. Онтон «Хотугу сулус» сурунаалга тиийэн Эллэйтэн көрдөстүм: «Серафим Романович, ийэ туһунан ырыа суруйуохпун ба5арабын, баһаалыста хоһоонно суруй эрэ». Кини миигиттэн наар кээмэйин ыйытааччы: «Хас куплеттаах, хайдах быһыылаах буолуохтааҕый?» Бачча куплеттаах, хос ырыалаах буолуохтаах диэн баран эттим: «Бу баар тыыннаах киһи туһунан буолуохтаах. Ийэ хаһан да өлбөт, куруук тыыннаах, аттыгар сылдьар», — диэтим. Ити курдук сакаас биэрэн баран Красноярскайга бардым. Сибиир уонна Дальнай Восток телевидениелэрин фестивала буолбута, онно саха делегациятыгар киирэн бара сылдьыбытым. Төннөн кэлэн баран Серафим Романович кабинетыгар киирэрбин кытта: «Дьахтар күнүнээҕи «Кыым» хаһыакка бэчээттэммитэ», — диэтэ. Инньэ диирин кытта библиотекаҕа сүүрэн тиийэн устан ыллым. Өр буолбатаҕа, ыллаабытынан барбытым.

Уопсайынан, Эллэй хоһооннорун мин олус түргэнник ыллыырым. Хайдах эрэ бэйэҥ ол хоһооннорго бэлэм сылдьар курдуккун. Кини миэхэ түргэн баҕайытык суруйар. Холобур, «Чочур Мураан» диэн ырыаны суруйтаран ылан баран, ити Үп министерствотын дьиэтиттэн тахсан бараммын былыргы кыһыл кирпииччэ баанньыкка тиийиэхпэр диэри:

Умай, умай аал уотум

Умуллубат кутаанан,

Дуорай, дуорай тойгугум

Туундара, тайҕа устунан

диэн тута ыллаан кэбиспитим. Ити курдук кини сүрдээх чаҕылхай, киһи дууһатын, настарыанньатын тута таба тайанар хоһооннордоох.

…-Эллэй ханнык ырыаҕын ордук сөбүлээбитэй?

-«Ырыаларбын кынаттаан көтүппүтүҥ иһин», «Таптыаҕыҥ ийэни» курдук үчүгэй ырыата оҥор»

, — диэн суруктара бааллар. Онон ити ырыаны ордук сөбүлээбит буолуохтаах».

«Ырыам-Аммам туһунан» [Ольга Иванованы кытта кэпсэтии]. Борис Павлов «Сахалар дьылҕа-хаан ыйааҕынан» кинигэтиттэн. 39-40 с.

Серафим Романович сиэн быраата скульптор Вячеслав Иванович Кулачиков 2022 с. Эллэй музей-дьиэтин аттыгар бу ырыаҕа өйдөбүнньүк бэлиэни оҥорон туруорбута.