Мин өйдүүрбүнэн Кулачиков Серафим Романович төрөппүттэрэ Роман уонна Татьяна Мойуона алааска хотугулуу-арҕаа өттүгэр олорбуттара. Романнаах Серафим, Михаил, Матрена, Лидия, Александр уонна Нина диэн оҕолоохторо. Роман улахан уус буолан уһанар, бултуур, оттон Татьяна ыалга иистэнэр буолан олороллоро. Серафим — суруйааччы, Михаил — учуутал (нуучча тыла), Матрена-биэлсэр, Лидия-сибээс үлэһитэ этилэр. Александр педрабфакка үөрэнэ сылдьан сэллик буолан өлбүтэ. Нина Ленинградка Институт Севера үөрэнэ баран баран блокадаҕа түбэһэн өлбүт быһылаах.

Роман Иванович бастакы кэргэниттэн Роман диэн уоллааҕа кэргэннэнэн баран өлбүтэ, бастакы кэргэниттэн уонна оҕолооҕун билбэппин.

Романнаах чугас ыаллара Кулачиков Дмитрий Иванович этэ, эмиэ уус киһи. Мария, Рамин, Семен диэн оҕолордооҕо.

Өрүүнэкэ диэн эдьиийдэрэ Дөгдүкээҥҥэ олорбута, онтон Посельскай Петр (Бүөтүрүнньэ) диэн уол хаалан Уус-Тааттаҕа Кулачиков Михаил Романовичка олорор.

Татьяна Сергеевна төрөппүттэрэ үксүн Ноху диэн сиргэ дьаам сүүрдээччинэн олорбуттара. Аҕалара Сергей Орджоникидзе оройуонун киһитэ үһү. Хайдах Охотскай Перевозка кэлбитэ биллибэт. Татьяна ийэтэ Дон казагын кыыһа Екатерина диэн ааттааҕа. Куп-кугас баттахтаах нуучча эмээхсинин көрбүтүм, сүүс сааһыттан тахсан баран өлбүтэ. Эдьиийэ эмиэ. Серафим Романович ийэтэ Татьяна Сергеевна уонна мин ийэм Анна Сергеевна бииргэ төрөөбүттэр. Мин эбээбин кыра эрдэхпинэ көрбүтүм.

Серафим Романович аҕата куртаҕа ыалдьан өлбүтэ, онтон ийэтэ рожа ыарыыттан операция кэнниттэн өлбүтэ.

Ол бириэмэҕэ аҕалара, аҕаларын урукку кэргэниттэн уола, кийииттэрин өлбүтүн кэннэ өлбүтэ. Онон дьиэлэригэр Мотя, Лидия, Шура, Нина бааллара. Кинилэр Замятин Дмитрий диэн ыалга дьукаах олорбуттара. Ийэтин V-с кылааска үөрэнэр кыыс Лидия Чөркөөхтөн өлбүтүн кэннэ атынан тиэйэн аҕалбытын өйдүүбүн. Ити 1931 с. буолуо.

Үлэһит буолан баран Серафимотпускатыгар  куруук тахсар буолара. Сайынын оттоһор буолара. Серафимнаах дьиэлэрин үрдүнэн «Кириэс үрүйэ» диэн сир баар, онно ырааһыйа сиргэ тахсан Серафим кинигэ ааҕара. Оҕолор кинини эккирэтэн тахсан мэниктиир этибит. Ону тохтуу түһэн баран үүрэн ыыталлара.

Ахтыыны суруйдум Вера Артемьевна Васильева.

1989 сыл, сэтинньи 21 күнэ.