1 Star2 Stars3 Stars4 Stars5 Stars (1 votes, average: 5,00 out of 5)
Загрузка...
385 views

«Кэрэ бэлэх» кинигэ биһирэмэ

Олунньу ый 17 күнүгэр   биир дойдулаахпыт РФ, СӨ доруобуйаҕа харыстабылын туйгуна Ньургуйаана Владимировна Аввакумова-Күлүм «Кэрэ бэлэх» кинигэтин биһирэмэ буолан ааста. Дьоро түһүлгэ мааны ыалдьыттарынан  — суруйааччы, «Күрүлгэн» уус-уран сурунаал сүрүн эрэдээктэрэ Афанасий Гаврильевич Гуринов-Арчылан, «Тыгын Дархан» киинэҕэ сүрүн оруолу толорбут артыыс Бэчигэн Ньургун Миитэрэй уола, ырыаһыт Анна Торохова буоллулар. Ыалдьыттарбыт Николаевскай таҥара дьиэтигэр сылдьан куолакал тыаһын иһиттилэр, Өксөкүлээх Өлөксөй балаҕанын, Эллэй музей дьиэтин көрдүлэр.

Кинигэ биһирэмигэр олохтоохтор тоҕуоруһа муһуннулар. Дьоро түһүлгэни баһылык солбуйааччыта И.П. Ефимова, «Айылгы» норуот айымньытын дьиэтин салайааччыта М.К. Решетникова иилээн-саҕалаан ыыттылар.

“Кэрэ бэлэх”  хоһоонун хомуурунньугун Ньургуйаана Аввакумова   Москуба куоракка “Перо” издательствоҕа бэчээттэппит,   төрөппүттэрин Светослана Николаевна,  Владимир Яковлевич Аввакумовтар сырдык кэриэстэригэр анаан таһааттарбыт.

Ийэтэ Светослана Николаевна ураннык тикпит “Үс кут” триптих иис  оҥоһуктарыттан сиэттэрэн кинигэтин үс  түһүмэҕин аатын толкуйдаан таһаарбыт. 

Худуоһунньук Феодосий Заровняев үлэлэрин бастаан Төҥүлү кафетыгар көрөн баран “мин хоһооннорум ойууламмыт курдуктар” диэн чугастык ылынан,  кэпсэтэн сөбүлэҥин ылан кинигэтигэр туһаммытын, кэлин  худуоһунньук персональнай выставкатыгар хоһооннорунан кыттыспытын кэпсээтэ.

Кинигэ хас биирдии тылын иҥэн-тоҥон быһаарсан таһааттарбыт А. Г. Гуринов-Арчылан, уус-уран айымньы ким суруйбутуттан, омугуттан, сааһыттан тутулуга суох ааҕааччыга тиийимтиэ буоллаҕына дьону долгутар, үйэлээх буолар, Күлүм айымньыларыгар ол баар диэн сыанабылын эттэ.

Олохтоох оскуола учуутала Т. С. Григорьева кинигэни ырытан суруйбутун учуутал А.П. Малышева аахта. Нэһилиэкпит 100 сылыгар ыытыллыбыт конкурска кыттан кыайыылаах буолбут «Чычымаҕым түөрт кэмэ» хоһоону Татьяна Табунанова толорон иһитиннэрдэ.

Мустубут ыалдьыттар Күлүм хоһооннорун СӨ үтүөлээх артыыһа Ирина Никифорова толоруутугар “Дорҕоон дойду” студияҕа уһуллан видеоклип буолбуттарын долгуйа көрдүлэр,  Күлүм тылларыгар “Күөрчэх кыыһа” ырыаны Анна Торохова  толоруутугар тутан олорон истэн дьоллоннулар. Ырыа толоруллар кэмигэр дьэдьэннээх тоҥ күөрчэҕи амсайан оҕо саастарын санаан аастылар.

Бүтүн Россиятааҕы, Аан дойдутааҕы киинэ фестивалларын “Бастыҥ эр киһи оруола” анал аат хаһаайыннара Бэчигэн Ньургун Күлүм хоһооннорун чугастык ылынан иһигэр киллэрэн ааҕарга сөбүлэммитин, ордук сөбүлээбит хоһоонунан “Күөрчэх кыыһа” буоларын, “Дорҕоон дойду” студияҕа музыкант Герасим Павлов – Дьарааһын тыыннаах доҕуһуолунан толорон уһуллубут түгэннэрин кэпсээтэ, хас да хоһоону аахпытын мустубут дьон астына иһиттилэр.

Нэһилиэк баһылыга Соров С.С. Ньургуйаана Владимировнаны Россия доруобуйатын харыстабылын туйгуна буолбутунан, “Үрдэл -2022” национальнай премияҕа “Бастыҥ автор” анал аакка тиксибитинэн,  кинигэтэ күн сирин көрбүтүнэн эҕэрдэлээтэ, төрөөбүт нэһилиэгэр мэлдьи күүс-көмө буоларын иһин махталын биллэрэн туран “Амма нэһилиэгэ сайдыытыгар тус кылаатын иһин” анал бэлиэни, Тааттатааҕы киин балыыһа, норуот айымньытын дьиэтин Бочуотунай грамоталарын дохсун ытыс тыаһынан туттарда. Кини бэйэтин этиитигэр, Чычымах сириттэн үөскээн-үүнэн тахсыбыт улуу суруйааччыларбыт Өксөкүлээх Өлөксөй, Эллэй, Амма Аччыгыйа,  Р. А. Кулаковскай, кинилэр утумнааччылара – А. Р. Кулаковскай-Дьэҥкир, Д. Е. Афанасьев-Талба, В. И. Кулачикова-Үрүччэ, уо. д. а.  ааттарын ааттаппыт айар дьоҕурдаахтарбыт кэннилэриттэн кэлэр көлүөнэҕэ Ньургуйаана Аввакумова –Күлүм бастакы буоларын  эттэ. Кини, Ньургуйаана Аввакумова хоһоону айан баран сыттыктарын анныгар кистээн кэбиһэр үгүс дьонтон уратытынан, кинигэтин таһааттарарынан эрэ муҥурдаммакка, культура, искусство бары салаатын хабан айымньылара салҕыы сайдарыгар үлэлэһэрин ыйан, Күлүм литература эйгэтигэр ураты, аныгылыы суоллаах-иистээх киирбитин бэлиэтээтэ.

Биир дойдулаахтара Ньургуйаана Владимировнаны ситиһиилэринэн ис сүрэхтэриттэн долгуйан туран эҕэрдэлээтилэр, үтүө баҕа санааларын эттилэр, төрөппүттэрин ахтан- санаан долгуйан аастылар. Педагогическай үлэ ветерана, импровизатор хомусчут, айар талааннаах А. Н. Канаева-Дьүрүскээнэ ырыа доҕуһуоллаах хомуска оонньоон эҕэрдэлээтэ.   Дьоро түһүлгэни алаас дыргыл сыттаах отун буруолатан арчылаан аспыт педагогическай үлэ ветерана Т. В. Ефимова бэйэтин эҕэрдэтигэр  “суруйар санааҥ сытыы бөрүөҥ төбөтүгэр дьэргэлгэн буолан дьэрэлийдин, тохтор оҕуруо тылларыҥ сиэдэрэй оһуор буолан тиһилиннин” диэн баҕа санаатын тириэртэ.

«Кэрэ бэлэх» кинигэтин автор күн сирин көрөөтүн кытта чугас дьонугар, библиотека ааҕааччыларыгар бэлэх ууммута. Бу дьоро күн автограф-сессияҕа кинигэ атыыга хамаҕатык барда, баҕалаах эрэ барыта тиксибэтэ. Ыалдьыппыт Арчылан олохтоох библиотекаҕа айымньыларын, редактордаан таһаарбыт уонча кинигэлэрин бэйэтин уонна «Ситим» медиа-бөлөх аатыттан бэлэхтээн үөрүүбүтүн үрдэттэ.

Бары мустубут дьон  сэргэх кэпсээннэри, хоһооннору истэн, Анна Торохова ырыаларыгар сааланы эргичийэ үҥкүүлээн  долгуйа астынан, дуоһуйа сынньанан, махтанан тарҕастылар. 

Дьоро түһүлгэбитин киэргэппит күндү ыалдьыттарбытыгар улахан  махталбытын тиэрдэбит. Талааннаах кыыспытыгар айар аартыгыҥ кэҥээн истин, аатыҥ ааттана турдун диэн алгыспытын аныыбыт.

Добавить комментарий

Ваш адрес email не будет опубликован. Обязательные поля помечены *