Учуутал уонна уһуйааччы сылыгар туһуламмыт «Бииргэ ааҕабыт»  Бүтүн Россиятааҕы «Библиотекаҕа түүн-2023» акция чэрчитинэн ыытыллыбыт тэрээһиҥҥэ араас саастаах элбэх киһи сырытта. Мустубут ыалдьыттар Суорун Омоллоон «Хараҥаҕа тыкпыт сырдык» айымньытынан киинэни көрдүлэр, төрүт культура пропагандиһа, олоҥхоһут, оһуохайдьыт  Алексей Николаевич Николаев сэргэх кэпсээннэрин болҕойон иһиттилэр.

Талба талааннаах ветеран-педагог Надежда Николаевна Большакова таҥастан хартыынаны оҥорууну көрдөрдө.

Ф.С. Аргунов аатынан Тааттатааҕы Оҕо ускуустубатын дьиэтин филиалын уруһуйга уһуйааччыта Валентина Гаврильевна Антоева рогожка таҥас кырадаһыныттан пэчворк ньыматынан араас оҥоһуктары оҥорорго үөрэттэ.

С.Р. Кулачиков –Эллэй аатынан орто оскуола учуутала Зоя Софроновна Васильева сайра кэнсиэрбэттэн кэтилиэт оҥорон  оҕуруот астардаах тотоойу минньигэс бутерброд оҥорору көрдөрдө. 

В.С. Яковлев-Далан «Дьикти саас» сэһэнинэн ыытыллыбыт «Дьиктилээх хонуу»  оонньууга баҕалаах ыалдьыттарбыт оонньоотулар. Финалга тахсан муҥутуур кыайыылааҕынан Нина Петровна Неустроева буолла. Оонньооччулар флешбукка кыттан сөбүлүүр кинигэлэрин мустубут дьоҥҥо кэпсээтилэр

Дьоро киэһэҕэ кинигэ быыстапкалара турдулар, араас конкурстар, оонньуулар ыытылыннылар, буфет үлэлээтэ.

Латыынныы алпаабытынан сахалыы текси мүнүүтэҕэ ааҕыыга олохтоох оскуола учуутала А.В. Христофорова бастаата. Кольцону таба быраҕыыга А.П. Миронова тэҥнээҕин булбата. Уонна да атын  күрэхтэһиилэргэ мустубут ыалдьыттар бары үөрэ-көтө оонньоон, араас сатабылларга үөрэнэн, минньигэс ас амсайан астынан, сэргэхсийэн тарҕастылар.

Бары кэлэн кыттыыны ылбыт ыалдьыттарбытыгар, көмөлөспүт дьоммутугар А. П. Кулаковская аатынан библиотека, “Айылгы” норуот айымньытын дьиэтин аатыттан махталбытын тиэрдэбит.