Самаан сайын үгэннээн турдаҕына от ыйын 7 күнүгэр Амма эбэ үрдүгэр турар Унньуулалаахха «Өксөкүлээх түһүлгэтигэр»  «Уруу-хаан уруйданнын, удьуор ситимэ салҕаннын!» нэһилиэкпит ыһыаҕар киэн туттар биир дойдулаахпыт саха бастакы норуодунай поэта Серафим Романович Кулачиков-Эллэй төрөөбүтэ 120 сылыгар аналлаах «Эллэй ааҕыылара» уус-ураннык хоһоону ааҕыы аһаҕас күрэҕэ ыытылынна.

Алын сүһүөх кылаас үөрэнээччилэрин бөлөҕөр С.Р. Кулачиков-Эллэй аатынан орто оскуола 4 кылааһын үөрэнээччитэ Винокуров Дьулус (сал. Богдокумова А.А.) “Талыы-кэрэ Сахам сирэ”  хоһоонун ааҕан  1 миэстэҕэ тигистэ. 2 миэстэни Н. Е. Мординов – Амма Аччыгыйа аатынан Харбалаах орто оскуолатын 4 кылааһын үөрэнээччитэ Винокуров Слава  (сал. Кривошапкина В.С.) “Үлэ ырыата” хоһоонун толорон ылла. 3 миэстэни Чычымах орто оскуолатын 2 кылааһын үөрэнээччитэ Попова Сандаара (сал. Попова А.К.)  “Таптыаҕыҥ ийэни” хоһоонунан ылла. Орто бөлөх үөрэнээччилэр ортолоругар 1 миэстэни 5 кылаас үөрэнээччитэ  Миронова Юлия (Дьокуускай к. )(сал. Богдокумова А.А.) “Таптыаҕыҥ ийэни”  хоһоонун ааҕан ылла. 

2 миэстэҕэ Чычымах орто оскуолатын 5 кылааһын үөрэнээччитэ Ноенохов Эрсан (сал. Богдокумова А.А.) “Тааттаҕа”  хоһоонун ааҕан тигистэ.

Улахан дьон бөлөҕөр Сивцева Александра Петровна  “Чурум-Чурумчукуттан” быһа тардан ааҕан кыайыылааҕынан таҕыста.  2 миэстэни Слепцова Мария Степановна (Харбалаах) “Ол түүн” хоһоону ааҕан ылла. 3 миэстэни Захарова Александра Арсеньевна (Дьокуускай) «Төрөөбүт дойдубар» хоһоонунан ылла.

Күрэх кыттыылаахтара бука бары олус үчүгэйдик бэлэмнэнэн кэлэн кытыннылар, иэйиилээхтик аахтылар. Серафим Романович Кулачиков-Эллэй хаан-уруу аймахтара  анал бириистэрин туруораннар күрэх суолтатын өссө үрдэппиттэрин бэлиэтиибит. Ол курдук, Эллэй аҕатынан аймахтара Иван Иустинов Кулачиков оҕолорун , сиэннэрин аатыттан  Сергей Иванович Софронов бэйэтин тэрилтэтигэр дипломнары бэчээттээтэ, анал өйдөбүнньүк плакеткалары оҥорон кыттааччыларга бэлэхтээтилэр. Маны таһынан “Кэскиллээх ааҕааччы”  анал бириистэрин саамай эдэр кыттааччыга Попова Сандаараҕа туттардылар.

Эллэй ийэтин Татьяна Сергеевнаны кытта бииргэ төрөөбүт Литвинцева Анна Сергеевна сиэннэрэ, хос сиэннэрэ туруорбут анал бириистэрин  Миронова Юлияҕа туттардылар.

Эллэй хоһооннорун уус-ураннык ааҕыы күрэҕин кыттыылаахтарыгар, күрэҕи тэрийэргэ көмөлөспүт Эллэй аймахтарыгар махтанабыт. Инникитин даҕаны үөрүүнү үрдэтэ, үйэлээҕи үксэтэ сылдьаргытыгар баҕарабыт.