Саха тыла -аар тайҕа!

Саха тыла -баай байҕал!

Саха тыла -арҕас хайа!

Саха тыла -мэҥэ халлаан!

Саха тыла -хаар туундара,

Саха тыла -таалар сыһыы,

Күөгэлдьийэр күөх алаас!

  Петр Тобуруокап .

         Саха Сирин бастакы Президенэ М.Е. Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕыгар олоҕуран, Семен Андреевич Новгородов төрөөбүт күнэ — олунньу 13 күнэ — Төрөөбүт тыл уонна сурук-бичик күнүнэн биллэриллибитэ.

Төрөөбүт тыл уонна сурук-бичик күнүгэр сарсыарда олохтоох дьаһалта дьиэтигэр  «Сахалыы дьыктаан» акцияҕа кыттыы, эбиэт кэннэ “Дьулуур”  спорт саалатыгар “Дьиктилээх хонуу” оонньуу тэрилиннэ.

Өрөспүүбүлүкэ үрдүнэн 11- с сылын ыытыллар   «Сахалыы дьыктаан» акцияҕа  барыта 10 киһи кыттыста. Дьыктааны А.Е.Кулаковскай аатынан норуот айымньытын дьиэтин директора Варвара Власова аахта.

Саха суругунан литературата төрүттэммитэ 125 сылыгар анаммыт “Дьиктилээх хонуу” оонньуу А.Е. Кулаковскай — Өксөкүлээх Өлөксөй “Байанай алгыһа” айымньытынан ыытылынна.

Биллэрин курдук, Саха литературата биир дойдулаахпыт Өксөкүлээх Өлөксөй 1900 сыллаахха Учайга суруйбут «Байанай алгыһа” айымньытыттан саҕаламмыта. «Сурукка суруллубут тыл үгэһэ, тыл хоһооно, айар санаа илбиһэ Саха сиригэр Өксөкүлээх үйэтиттэн ыла үөскээбитэ диэн бары этиэхтэрэ», — диэн суруйбута П.А. Ойуунускай.

Дьоро тэрээһин Канаева Анна Афанасьевна таһаарыытыгар таатталыы оһуохайынан саҕаланна.

Күрэхтэһиигэ барыта 4 түөлбэттэн уопсайа 12 киһи кытынна. 3 түһүмэх түмүгүнэн Павлова Е.В., Гуляев А.А., Кулаковскай А.И. кыайыылааҕынан тахсаннар финалга кытыннылар. Финал кыайыылааҕынан Кулаковскай Андрей Иванович буолла. Маны таһынан көрөөччүлэри кытта оонньуу кыайыылааҕынан Гуляев Александр Александрович таҕыста. “Дьиктилээх хонууну” Варвара Власова –Чэмэлиинэ иилээн-саҕалаан ыытта. Александр Гуляев эҕэрдэ ырыатын сэргээн иһиттибит.

Бүгүҥҥү тэрээһиннэргэ  кыттыбыт бары дьоммутугар махталбытын тиэрдэбит. Төрөөбүт тылбытын үөрэтэ, өрөгөйүн үрдэтэ, кэскилин кэҥэтэ туруоҕуҥ !