1 Star2 Stars3 Stars4 Stars5 Stars (No Ratings Yet)
Загрузка...
128 views

Сосина (Аввакумова) Елена Константиновна

Сосина (Аввакумова)

Елена Константиновна

Мин ийэм Аввакумова (Сосина) Елена Константиновна 08.01.1960 сыллаахха Таатта улууһугар Чычымахха күн сирин көрбүтэ. Оскуолаҕа үөрэнэ сылдьан куоракка эдьиийигэр Өлөөнөҕө кэлэн иитиллибитэ. Куоракка 2-с №-х оскуолаҕа үөрэммитэ. Өлөөнөлөөҕү кытта Ломоносов уулусса 50-гар олорбуттара. Эдьиийэ Өлөөнө, күтүөтэ Илья бэйэлэрин оҕолорун Надяны, Оляны, Володяны кытта тэҥҥэ тутан ииппиттэрэ. Эдэриттэн олус үлэһит этэ: дьиэни сууйара-тарыыра, ас бөҕө астыыра. Үөрэҕэр да үчүгэйэ. Оскуолатын бүтэрэн баран Бурятияҕа баран инженер-землеустроитель үөрэҕэр үөрэммитэ. Ол кэннэ Анаабыр улууһугар үлэлии кэлбитэ, эдьиийбитин Геленаны төрөппүтэ. 1986 с. Сосин Александрга кэргэн тахсан уоллаах кыыс оҕоломмуттара. 1995 с. Александрдыын арахсан кыра оҕолордоох соҕотоҕун туран хаалбыта. Ол да үрдүнэн күүстээх санаалаах буолан сүүрэн-көтөн дьиэ булунан, үлэлээн-хамсаан оҕолорун иитэн олорбута.

Дьоҥҥо –сэргэҕэ барыларыгар көмөлөһөр этэ: аймахтарыгар, табаарыстарыгар, билэр дьонугар. 1997 с. МВД школатыгар үлэлии сылдьыбыта. 2000 сыл саҕаланыытыттан урбаанньыттаабыта. Крестьянскай, Столичнай рыноктарга үлэлиирэ. Бэйэтин таҥастарын-саптарын атыылыыра. 2007 с. аһары тыйыс -тымныыга таһырдьа үлэлээн доруобуйата мөлтүүр. 2009 с. доруобуйата тулуйбакка бу орто дойдуттан туораабыта.

Биһиги, оҕолоро, ийэбитигэр үйэлэргэ махтанабыт! Соҕотох ийэбит барахсан үчүгэй суолунан иитэн таһаарбытыгар. Билигин баара буоллар оҕолорунан киэн туттуо этэ. Улахан кыыс Гелена-үрдүк үөрэхтээх, ыал, кыыс оҕолоох, Чымнаайыга олорор. Уола Михаил- үрдүк үөрэхтээх, быйыл аспирантураны бүтэрдэ. Дьокуускай куоракка олорор, дьокутаат көмөлөһөөччүтүнэн үлэлиир. Кыра кыыс Галина үрдүк үөрэхтээх нуучча тылын учуутала, Дьокуускай куорат 22-с №-х оскуолатыгар үлэлиир.

Ахтыыны оҥордо уола Сосин Михаил Александрович.

Сэтинньи, 2017 с.