Афанасьев Владимир Куприянович
(1923-1978 с.с.)

Биһиги аҕабыт Афанасьев Владимир Куприянович 1923 с. 28/V Аллараа Амма нэһилиэгэр орто бааһынай дьиэ кэргэннэ төрөөбүтэ. Чычымах 7 кылаастаах оскуолатын бутэрэн Ытык-Күөлгэ орто оскуолаҕа үөрэммитэ. 1942 сыллаахха бастакы выпусктар этилэр.
Оскуоланы бутэрээт сэриигэ барбыттара. Иркутскай обл., Мальтаҕа 6 ый байыаннай үөрэххэ үөрэнэн Арҕаа фроҥҥа ыытыллар. Смоленскай обл. сэриилэһэр. Автоматчик-пулеметчик. Ю. А. Гагарин төрөөбүт куоратыгар Гжатскайга бааһырбыт. Өстөөх буулдьата сототун унуоҕун үлтүрүппүт. Украинскай фронт сэриилэрин састаабыгар сылдьан Крымы босхолоспута. Онно көрдөрбүт хорсун быһыытын иһин Кыһыл Сулус орденынан наҕараадаламмыт. Германияны Кыайыы иһин мэтээллээх сэрииттэн эргиллэн кэлбитэ 1944 с. II группалаах инвалид буолан. Сэрии туһунан кэпсээбэт этэ.
2 сыл эмтэнэн, ол кэмҥэ дойдутугар колхозка булчут этэ. 1947 с. Учительскай институтка киирэн история учуутала буолан элбэх көлүөнэ ыччаты үөрэппитэ.
Оҕолору саахымакка эмиэ үөрэппитэ. Кини уруогун сүрдээх интэриэһинэйдик ыытара диэн үөрэппит оҕолоро кэпсииллэрин элбэхтэ истибитим. Сайын оскуола оҕолорун биригээдэ оҥорон окко илдьэ сылдьара. Киэһээ отуу тугэҕэр сытан оҕолору кытары саахыматтыыр эбит. Наар кыайарыттан кыһыйан оҕолор фигуратын атастаһыннаран тутуллан кыбыстыыга киирэллэр эбит. Оскуола оҕолоро ол кэмҥэ улууска күүстээх хамаанда туруоран куруук кыайаллар эбит.
1949 с. Саха Республикатыгар саахымакка чемпион буолбута. Уопсайа түөрт төгүл республикаҕа чемпионнаабыта. 30-ча сыл саахыматынан дьарыктаммыта. Россия тыа сирин саахымакка курэхтэһиитигэр Саха Сирин хамандаата 1953 с. аан бастаан кыттыбыта уонна иккис миэстэ буолбута. Саха сириттэн хамаанда 5 оонньооччу, онно кини капитан этэ. Ол күрэхтэһиигэ 16 хамаанда кыттыбыт. Москва, Ленинград хамаандаларын кэннилэригэр хаалларбыттар. Кэлин ити күрэхтэһиигэ Саха Сирин хамаандата хаста да бастаабыта. Саха Сиригэр саахымат сайдыытыгар үтүөлэрин иһин 4 төгүл Саха Республикатын Верховнай Советын Почетнай грамотатынан наҕараадаламмыта. Маастарга кандидат этэ. Республика тас өттүгэр курэхтэһэ бардаҕына радиоҕа истэрбит, кэтэһэрбит.
Биһиги аҕабыт кусчут, балыксыт этэ. Ыраас дууһалаах үөрүнньэҥ, сайаҕас киһи этэ. Быраата Михаил Афанасьев, балта Анна Афанасьева буолан элбэх күрэхтэһиилэргэ кыттаннар Саха Сирин чиэһин элбэхтик көмүскээбиттэрэ. Элбэх оҕоҕо билиини биэрбит, элбэх көлүөнэ умнубакка саныыр убаастабыллаах, тапталлаах учуутала этэ. Саха Сиригэр саахымат спорда сайдыытыгар киллэрбит кылаата кини аатын ааттата туруоҕа. Маннык аҕалаахпытынан киэн туттабыт.
55 эрэ сааһыгар сэриигэ ылбыт бааһырыытыттан сибээстээн олохтон туораабыта. Кини олоҕун оҕолоро, сиэннэрэ, хос сиэннэрэ салҕыыллар.

Ахтыыны суруйдум
улахан кыыһа
Стручкова Антонина Владимировна
23.11.2022 с.

1937 с. Чычымах оскуолатын үөрэнээччилэрэ. Бастакы эрээккэ хаҥастан уҥа иккис Владимир Куприянович олорор. Иккис эрээккэ хаҥастан уҥа бастакы учууталлара Малышев Николай Романович.

Ветераннар Кыайыы күнүгэр салют ыталлар. Уҥаттан үһүс сэрии ветерана, Кыһыл Сулус орден кавалера, саахымакка спорт маастарыгар кандидат, республика 4 төгүллээх чемпиона  Афанасьев Владимир Куприянович.