Васильев Иван Семенович (1889-1965)

Васильев Иван Семенович кыыһа Анна Ивановна санэпидемиологическай сулууспа бочуоттаах үлэһитэ. Билигин Ытык-Күөлгэ олорор. 1962 с. медучилищены бүтэрэн Чычымахха акушеркалаабыта. Онтон санэпидстанцияҕа эпидемиолог көмөлөһөөччүтүнэн, лаборанынан үлэлээбитэ. Кини  аҕатын туһунан маннык суруйар:

«Мин аҕам Васильев Иван Семенович 1889 с. «Төҥүттэ» алааска Семен, Евдокия Васильевтарга алтыс оҕонон төрөөбүт. Кини кэнниттэн биир кыыс төрөөбүт. Аҕалара эрдэ өлөн, мин аҕабын ийэтэ Хаадьымаҕа олорор ыалга ииттэрэ биэрбит.

Аҕам улаатан, ыал буолан баран «Тараҕана» алаас арҕаа баһыгар, билигин сайылык дьиэлэрэ баар сирдэрин диэки дьиэ туттан олорбут. Кэлин оскуолаҕа чугаһаан «Ынах күөлүгэр» көспүттэр. Онно мин 2-3 саастааҕым буолуо. Ол саҕана «Тараҕана» алааһын тула элбэх ыал олорбуттар.

Аҕам икки убайдаах этэ. Васильев Николай Семенович – Сиэҥкэ – Васильев Семен Николаевич аҕата. Кыра убайа Васильев Артемий Семенович –Вера Артемьевна, Татьяна Артемьевна, Александр Артемьевич Васильевтар аҕалара. Үс бырааттыылар үһүөн холкуоска сылгыһыттаабыттар.

Мин аҕам сэрии бүтүөр диэри үлэлээбит. Кэнники сүһүөхтэрэ ыалдьар этэ. Аҕам таҥыннаҕына мин ыйытар этим: «Ханна бардыҥ?»- диэн, ону кини: «Сылгы көрө бардым»-, диэн хоруйдуурун өйдүүбүн.  Оччолорго мин кыра буоламмын үчүгэйдик өйдөөбөппүн. Бырааттыылар үһүөн сааһыран сэрии кэнниттэн сылгыларыттан уурайбыттар».