«Иллюстрированная энциклопедия Республики Саха (Якутия) : цифры, факты, карты» кинигэ Сахабыт сирин улуустарын  кылгастык эрээри чуолкайдык сырдатар.

«Саха ойуута-бичигэ» альбом кинигэҕэ Мандар Уус 40 сыл устата хомуйбут, үөрэппит XVIII-XX үйэлэрдээҕи саха норуотун оһуорун-мандарын кытта билсиэххит.

«Таатта оҕото Дьаралыктыйа Былатыан» диэн В.Б. Окорокова, В.Н. Луковцев хомуйан оҥорбут кинигэлэригэр саха норуотун чулуу уолун П.А. Ойуунускай олоҕун  туһунан, кинини киһи быһыытынан арыйан көрдөрөр ахтыылар киирбиттэр.

Саха народнай суруйааччыта Василий Егорович Васильев- Харысхал «Ааспыт кэм аартыктарынан» документальнай романыгар саха ытык-мааны дьонун туһунан урукку өттүгэр этиллибэтэх кырдьыгы  ааҕыаххыт.

Народнай суруйааччы Софрон Данилов «Норуотум дьылҕата» кинигэтигэр норуотун дьылҕатыгар сыһыаннаах бэлиэтээһиннэрэ, публицистиката киллэриллибиттэр.

Наталья Михалева – Сайа «Уйгур» кинигэтигэр киирбит сэһэн, кэпсээн, эссе Аҕа дойду Улуу сэриитигэр анаммыттар.  Сэрии хонуутугар уонна тыылга Кыайыыны уһансыбыт саха дьонун олоҕо долгутуулаахтык ойууламмыт.

Сергей Кужугетович Шойгу «Про вчера» кинигэтигэр оҕо сааһын,  олоҕор араас быһыыга-майгыга көрсүбүт дьонун, о.д.а. туһунан умсугутуулаахтык кэпсэнэр.

Эдэр суруйааччы Татьяна Поскачина «Табыллыбат/ табыллыбыт таптал. Учуутал күннүгэ» сэһэнигэр үлэтин саҥа саҕалаан эрэ учуутал кыыс күннүгүн сэгэтэн кини олоҕун, кистэлэҥ тапталын туһунан билиэххит

Нина Дьячковская «Исповедь исчезнувших» кинигэтэ дьиҥнээх олохтон ылыллан суруллубут. Манна Сэбиэскэй Сойуус ыһыллар кэмигэр  ийэлэрин кытта Орто Азияҕа барсыбыт икки кыракый уолаттар  көрсүбүт ыарахаттарын туһунан долгуйа ааҕабыт.

Тина Амергазина «Цветы на ветру» диэн дьиҥ олохтон ылан суруйбут кинигэтэ  аахпыты эрэ барытын долгутар. Манна икки улаатан эрэр тус-туспа эйгэҕэ иитиллибит кыргыттар доҕордоһуулара, кинилэр дьылҕалара кэпсэнэр.