Жараев Владимир Егорович (1964-2000)

Владимир Егорович Жараев 1964 с. от ыйын 4 күнүгэр Дьохсоҕоҥҥо төрөөбүтэ. Аҕалара Егор Егорович сылгыһытынан үлэлээбит. Володя эмиэ кыра эрдэҕиттэн сылгыны наһаа сөбүлүүрэ, аты миинэр баҕаттан фермаҕа бостууктуура. Кэлин баҕа санаата туолан сылгыһыт буолбута. Бастаан Иванов Поликарп Поликарпович салайааччылаах сылгыһыттар биригээдэлэригэр сылдьыбыта. Онно Афанасьев С.И., Старостин К.П., Софронов И.П., Табунанов Р.Н. буолан үлэлээбиттэрэ. Кэнники биригэдьиирдэрэ Андросов Павел Павлович буолбута. 

Кэргэнэ Мария Ефимовна ахтыытыттан: «Биһиги 1982 сыллаахха ыал буолан буолан үс оҕоломмуппут. Кэргэним наһаа сымнаҕас, элэккэй майгылаах этэ. Художественнай самодеятельноска көхтөөхтүк кыттара. Ол курдук,  ыллыырын сөбүлүүрэ, үҥкүүлүүрэ. Үҥкүүһүттэр бөлөхтөрүгэр киирэн саха үҥкүүтүн толорон оройуоҥҥа лауреат буолбуттара. Кинигэни олус сөбүлээн ааҕара. Ордук саха классиктарын айымньыларын умсугуйан ааҕара.  Олус үчүгэйдик иистэнэр этэ. Тыс имитэн уолаттарыгар бачыыҥка тигэрэ, андаатара тириитин имитэн бэргэһэ тигэрэ, үтүлүгүн, бэргэһэтин бэйэтэ хараҕынан көрөн быһан тиктэрэ. Кыыһа Марианна детсадка сырыттаҕына үҥкүүлүүр таҥаһын тикпитэ.

Сылгыһыттыы сылдьан ат сүүрдүүтүнэн утумнаахтык дьарыктаммыта. Оройуоҥҥа хаста да миэстэлэспитэ. Үлэтин үгэнигэр сылдьан эдэр сааһыгар 2000 сыллаахха хомолтолоохтук орто дойдуттан күрэммитэ».