Маркова Акулина Корниловна

Мин Чычымахха 1981 с. күhүн библиотекаҕа ананан үлэлии барбытым. Мин үлэлии тиийбиппэр библиотека таҥара дьиэтин пристройугар баара. Тиийээт да үлэбин мин иннинэ үлэлээбит Наталья Петровна Колодезниковаттан туппутум. Ол күhүн саҥа кулууп үлэҕэ киирэн библиотекабытын киинэҕэ кэлбит оҕолору ыҥыран ылан илиилэригэр кинигэлэри туттаран баран эн бу кини кэнниттэн илдьэн Наталья Петровнаҕа биэрэн полкаҕа уурдараҕын диэн биэрбиппитин хата биир да оҕо сыыhа-халты туттубатах этэ. Оҕолор сүүрүүнэн начаас таhан кэбиспиттэрэ. Аны санаатахха оччотооҕу оҕолор бэрээдэктээх, истигэн да эбиттэр. Кулууп иhигэр кыра хоско библиотека кинигэлэрин оннук кѳhѳрбүппүт. Библиотекаҕа биэс сыл үлэлээбитим. Сайынын передвижка тэрийэн отчут звеноларыгар, сайылыкка ыанньыксыттарга мотоциклынан илдьэн аахтарарбыт. Кыhынын кыhыл муннуктарга салаасканан Толоон алдьаппыкка хас пятница аайы тиийэрим. Оскуола оҕолоро перемена ахсын сүүрэн киирэн Крокодил журналы наhаа сѳбүлээн кѳрѳллѳрүн ѳйдүүбүн. Кинигэни начальнай кылаас оҕолоругар передвижка олохтоон аахтарыыны тэрийбитим. Богдокумова Вера Васильевна кылааhын кытта шефство тэрийэн үлэлээбиппит. Библиотекаҕа аан бастакы сылбар хас биирдии кинигэҕэ саҥа вкладыштары клейдээн сыбаабытым. Хаhыаттан кырыйан темаларынан папка оҥорон үлэбэр элбэхтик туhаммытым. Мин библиотекаҕа үлэлиир сылларбар тех. үлэhитинэн Ньургустаана Васильевна Неустроева, Аржакова Раиса Ефимовна үлэлээбиттэрэ. Кулууп үлэhиттэрин кытта бииргэ былааннаан үлэлиирбит. Ол курдук, кулууп директорынан Колодезникова Наталья Петровна, Нимарицына Алья Никитична, Михайлова Клара Иннокентьевна, Беркина Раиса Ивановна, худругунан Огонерова Татьяна Николаевна үлэлээбиттэрэ.

Эдэр сааhым кэрэ кэмнэригэр Чычмахха үлэлии -үлэлии кульпросвет библиотечнай отделениетыгар кэтэхтэн үѳрэнэн бүтэрбитим. Оччотооҕу кэм ирдэбилигэр сѳп түбэhиннэрэн ааҕааччыны хабыыга, кинигэ биэриитигэр, посещаемостка былааммын куруук толорорум. Кыайыы 40 сылыгар аналлаах библиотекалар республикатааҕы кѳрүүлэригэр 4-с миэстэни ылбыппынан киэн туттабын. Биир сайын ѳссѳ специалистары кытта 15 хонукка от үлэтигэр үлэлээбитим. Билигин Уус Тааттаҕа модельнай библиотекаҕа сэбиэдиссэйинэн үлэлээбитим 30 сыла буолла, үрдүк үѳрэхтээхпин.  Үлэм ситиhиилэрэ: отличник культуры СССР, лучший работник культуры России, ветеран труда. Икки уоллаах кыыс оҕолоохпун.

2017 сыл