Канаев Николай Афанасьевич (1934-1993)

Мин аҕам Канаев Николай Афанасьевич 1934 с. Кыһыл Алдаҥҥа Мас Аппаҕа күн сирин көрбүтэ.

 1973-1977 сс. дылы «Коммунизм» совхозка коммунист  партия дьаһалынан Уучайга сылгыһыттарга салайааччынан үлэлээбит. Иванов П.П., Налыяхов С.В., Афанасьев С.И., Прокопьев В.К., Софронов К.И. кытта  үлэлээбиттэр.

Түмсүүлээхтик, кыһамньылаахтык үлэлээннэр, сылгы төрөөһүнүн 100%  былааннарын толорон, олус таһаарыылаахтык, көдьүүстээхтик үлэлииллэрин көрдөрбүттэр.

Оччолорго аҥардас нэһилиэккэ 1000-тан тахса сылгыны көрөн-истэн олорбуттар. Үлэлиир кэмнэригэр сылгыһыттар дьиэлэриттэн тэйэн, Уучайга олорон күннэтэ сылгыларын көрөн-харайан, сөптөөхтүк аһатан-сиэтэн туруктарын тупсараллара, үлэ күөстүү оргуйара.

Биһиги аҕабыт туох итэҕэһин-быһаҕаһын сотору-сотору билсэн, наадаларын ситиһэн кэлэ-бара сылдьар эбит.

Кэлин сылларга бэйэтэ кэтэх аттанан күн аайы үгүһү үлэлиирэ. 9 оҕолоох улахан дьиэ кэргэн баһылыга буолан нэһилиэккэ ыытыллар бары тэрээһиннэргэ кыттан, нэһилиэк депутата, дьон сөбүлүүр, ытыктыыр киһитэ буолан сирдээҕи олоҕун олорон 1993 сыллаахха күн сириттэн уһуннук ыалдьан арахсыбыта.

Ахтыыны биэрдэ төрөппүт кыыһа Марианна Николаевна Иванова

Кулун тутар, 2017 с.