Николай Кирикович Седалищев — Дьүөгэ Ааныстыырап (1913-1944).

1939 сылтан ССРС Суруйааччыларын союһун чилиэнэ, биллиилээх прозаик. Үөһээ Бүлүү Кэнтигэр төрөөбүтэ. Бүлүүтээҕи педтехникум икки курсун бүтэрбитэ. 1938 с. "Бэлэм буол" хаһыат эппиэттир сэкэрэтээринэн, онтон редакторынан анаммыта. 1941 с. армияҕа ыҥырыллыбыта. Калинин уонна Ленинград куораттар туһаайыыларыгар буолбут хабыр хапсыһыыларга кыттыбыта. 1944 с. олунньутуттан дьонугар суруга кэлбэт буолбут. Онтон ыла сураҕа суох сүппүттэр кэккэлэригэр киирбитэ.

Алексей Спиридонович Бродников (1917-1998).

1942 с. Чурапчытааҕы С.А. Новгородов аатынан педучилищены бүтэрэн, с аҥа учууталлаан иһэн Кыһыл Армия кэккэтигэр ыҥырыллыбыта. Свердлов куоракка байыаннай бэлэмнэниини ааспыта. Снайпер үөрэҕин барбыта. Онно тэриллибит 20-с нүөмэрдээх туспа хайыһар биригээдэтин 188-с стрелковай састаабыгар киирэн Старай Русса, Смоленскай, Холм куораттары босхолоспута. Хаста да бааһыран госпиталларга эмтэммитэ. Бойобуой үтүөлэрэ Албан аат уордьанын 3-с степенинэн, Аҕа дойду Улуу сэриитин 1-кы степеннээх уордьанынан уонна мэтээллэринэн бэлиэтэммитэ.

Николай Дмитриевич Слепцов- Туобулаахап (1912- 1964)

Чурапчы Бахсытыгар төрөөбүтэ. Москватааҕы А.В. Луначарскай аатынан актердар маастарыстыбаларын үрдэтэр мастарыскыайга дьарыктаммыта. М. Горькай аатынан Литературнай институкка үөрэммитэ. 1943 сылтан ССКП чилиэнэ, 1938 сылтан ССРС Суруйааччыларын союһун чилиэнэ. Биллиилээх драматург, театр режиссера.

Гаврил Иванович Макаров -Дьуон Дьаҥылы (1914-1956)

Чурапчы улууһугар Болтоҥо нэһилиэгэр Кындалга төрөөбүтэ. Поэт, тылбаасчыт, 1945 сылтан ССРС Суруйааччыларын союһун чилиэнэ. 1943 сыл күһүнүгэр хас да саханы кытта сылгылары Иркутскайга тиэрдэр сорудаҕы ылан, айаҥҥа турбуттара. Сылтан ордук кэмҥэ чараас таҥастаах дьон ыҥыырга олорон, айан саамай ыараханын-кытаанаҕын көрсүбүттэрэ. Сорудаҕы толорбуттара. Фронт үлэтигэр туһалыахтаах 300-н тахса сылгы Залари диэн тимир суол станциятыгар тиэрдиллибитэ.  Мальта  станцияттан Г.И. Макаров илиҥҥи кыраныыссаҕа турар байыаннай чаастарга утаарыллыбыта. 94-с дивизия 152-с стрелковай ротатыгар сулууспалаабыта. Японияны утары сэриигэ кыттыбыта. 1946 с. дойдутун «Кыайдыбыт» диэн хоһоон рукописьтаах булбута.

Степан Иванович Тимофеев (1921-2012)

Поэт, тылбаасчыт, Мэҥэ-Хаҥалас улууһугар төрөөбүтэ. 1940 с. армияҕа ыҥырыллыбыта. Сэрии саҕаланыаҥыттан Лениград таһыгар Карелия билиитигэр өстөөхтүүн сэриилэспитэ. «Лениграды обороналааһын» иһин мэтээллээх. Аҕа дойду Улуу сэриитин уордьанын кавалера. К. Симонов «Өлбүттэр уонна тыыннаахтар» диэн бөдөҥ айымньытын сахалыы тылбаастаабыта. 1964 сылтан ССРС Суруйааччыларын чилиэнэ, Саха Республикатын культуратын үтүөлээх үлэһитэ.

Макар Иванович Кузьмин — Макар Хара (1915-1981)

Дьокуускайдааҕы тыа хаһаайыстыбатын техникумугар, Москватааҕы Коммунистическай институт журналистикаҕа салаатыгар үөрэммитэ. 1931939 сс. Саха сирин Суруйааччыларын союһун тэрийэр бюротун секретара этэ. Уон сылтан ордук кэмҥэ «Кыым» хаһыавт отделын сэбиэдиссэйинэн үлэлээбитэ. 1941 с. атырдьах ыйыгар сэриигэ ыҥырыллыбыта. Ленинградскай, I Белорусскай, I Украинскай , I Прибалтийскай фроннарга хорсуннук сэриилэспитэ. Кыһыл Сулус уордьанынан, мэтээллэринэн наҕараадаламмыта. 1945 с. демобилизацияланан дойдутугар кэлбитэ.

Серафим Романович Кулачиков- Эллэй (1904-1976)

Саха бастакы народнай поэта, тылбаасчыт, публицист. Журналистары бэлэмниир Москватааҕы государственнай институту бүтэрбитэ.  «Кыым», «Социалистическая Якутия», «Чолбон», «Кыһыл ыллык», «Хотугу сулус» редакцияларыгар үлэлээбитэ. Саха сирин Суруйааччыларын союһун бырабылыанньатын председателинэн 1939 с. талыллан үлэлии олорон, 1942 с. Кыһыл Армия кэккэтигэр ыҥырыллыбыта. Старай Руссаны босхолооһуҥҥа буолбут хабыр хапсыһыыга снаряд дэлби ыстаныытыттан улаханнык дөйбүтэ. Онтон сылтаан иккис группалаах инбэлиит буолбута. Ыалдьан, 1944 сыл ахсынньытыгар демобилизацияламмыта, дойдутугар нэһиилэ кэлбитэ. Өр кэмҥэ  эмтэнэн атаҕар турбута.

Кыайыыга эрэли этэр хоһооннордоох саха поэттарыттан биир бастыҥнара этэ. «Күн сирин көмүскэлигэр» диэн хоһооннорун кинигэтэ 1943 сыллаахха, фроҥҥа сырыттаҕына бэчээттэнэн тахсыбыта.

Семен Осипович Никифоров (1923-1980)

СӨ культуратын үтүөлээх үлэһитэ, 1965 сылтан ССРС Суруйааччыларын союһун чилиэнэ, биллиилээх прозаик. Мэҥэ Хаҥалас улууһугар II Тыыллыма нэһилиэгэр  Хаатылымаҕа төрөөбүтэ.  1939 с. Хаатылыма оскуолатыгар улахан дьону ааҕарга-суруйарга үөрэппитэ. 1940 с. Дьокуускайдааҕы культурнай-сырдатар училищеҕа үөрэнэ киирбитэ. Бүтэрэн Өлүөхүмэ Токотугар Кыһыл Чуумҥа үлэлээбитэ. 1942 с. Кыһыл Армия кэккэтигэр ыҥырыллыбыта. Сэрии толоонугар биэс сылы толору сылдьыбыта. Албан аат III степеннээх уордьанынан, бойобуой мэтээллэринэн наҕараадаламмыта.

Сергей Степанович Васильев-Бороҕоонускай (1907-1975)

Поэт, публицист, оченкист, общественнай деятель, СӨ П.А. Ойуунускай аатынан государственнай бириэмийэтин лауреата, 1938 сылтан ССРС Суруйааччыларын союһун чилиэнэ

Владимир Михайлович Новиков- Күннүк Уурастыырап (1907-1990)

Саха народнай поэта, 1938 сылтан ССРС Суруйааччыларын союһун чилиэнэ, публицист, олоҥхоһут, тылбаасчыт.

Иннокентий Иванович Артамонов (1928-2006)

Поэт, тылбаасчыт. СӨ культуратын үтүөлээх үлэһитэ, РСФСР уонна ССРС бэчээтин туйгуна, 1964 сылтан ССРС Суруйааччыларын союһун чилиэнэ, СӨ Суруйааччыларын союһун чилиэнэ.  Японияны утары сэрии кыттыылааҕа.