Муус устар 12 күнүгэр   суруйааччы Реас Алексеевич Кулаковскай төрөөбүтэ 110 сылыгар аналлаах литературнай биэчэр ыытылынна.

Биэчэри А.Е.Кулаковскай аатынан Чычымахтааҕы норуот айымньытын дьиэтин директора В.В. Власова салайан ыытта. Суруйааччы туһунан слайданан презентацияны, видеолары көрдүбүт.

Суруйааччы «Оҕо суруга», «Истиҥ эрэ» кэпсээннэринэн «Сыккыс» театральнай түмсүү (сал. Власова В.В.)  инсценировка туруоран көрдөрдүлэр. 

Реас Алексеевич хоһоонноро, үгэлэрэ, чабырҕахтара оскуола оҕолорун толорууларыгар ааҕылыннылар. Дарыбыан Дабыыдап «Тойон Ньургун» олоҥхотун Реас Кулаковскай сурукка киллэрэн кинигэ буолан тахсыбыта. Онтон быһа тардыыны  олоҥхоһут Алексей Николаев толоруутугар иһиттибит.

Реас Алексеевич айымньыларынан 6 кылаас үөрэнээччитэ Ваня Ючюгяев «Көмүс эһэ көмүс үөрэҕэ» (сал. Павлова М.И.), 8 кылаас үөрэнээччитэ Варя Охотина «Киһи киһиэхэ көмөлөһөрүнэн киэркэйэр» (сал.Христофорова А.В.)  дакылааттары суруйбуттарын  кэпсээтилэр.

Дьоро киэһэни Виталий Власов истиҥ ырыаларынан киэргэттэ.

Дьоро киэһэ долгутуулаах түгэнинэн Реас Алексеевич үөрэнээччилэрин истиҥ-иһирэх ахтыылара буолла. Ветеран педагогтар Ефимова Т.В., Михайлов В.И., Васильева А.К., Кулачикова А.П., Канаева А.Н., оҕолору  билигин да үөрэтэ сылдьар энтузиаст уһуйааччы Богдокумова А.А. учууталларын махталынан аҕыннылар, оҕо саастарын  көрүдьүөстээх түгэннэрин ахтан- санаан күллэрэн да ыллылар. Бииртэн биир  үчүгэй, киһи иһиттэр истэ туруох курдук ахтыылары биир тыынынан дуоһуйа иһиттибит.